പരവൂർ: കാലഹരണപ്പെട്ടതും സർവീസ് അവസാനിപ്പിച്ചതുമായ ട്രെയിൻ കോച്ചുകൾ ഇനി ആക്രിവിലയ്ക്ക് വിൽക്കില്ല. പകരം അവ ജനങ്ങൾക്ക് രുചിവൈവിധ്യങ്ങൾ സമ്മാനിക്കുന്ന അത്യാധുനിക റെസ്റ്ററന്റുകളാകും.ദക്ഷിണ റെയിൽവേ നടപ്പിലാക്കുന്ന ഫുഡ് ഓൺ വീൽസ് പദ്ധതിയുടെ ആദ്യഘട്ടത്തിന് കൊച്ചി മട്ടാഞ്ചേരി ഹാൾട്ട് സ്റ്റേഷനിൽ തുടക്കമാവുകയാണ്. ഡീ-കമ്മീഷൻ ചെയ്ത (സർവീസ് നിർത്തിയ) ഒരു ട്രെയിൻ കോച്ചിനെ പൂർണമായി നവീകരിച്ചാണ് ഇവിടെ റെസ്റ്ററന്റ് ഒരുക്കുന്നത്.
റെസ്റ്റോറന്റ് നടത്തിപ്പിനായി ദക്ഷിണ റെയിൽവേ ഇതിനോടകം തന്നെ ടെൻഡർ ക്ഷണിച്ചുകഴിഞ്ഞു. റെയിൽവേ സ്റ്റേഷനുകളെ കൂടുതൽ ജനകീയമാക്കാനും ടൂറിസം സാധ്യതകൾ വർധിപ്പിക്കാനും ലക്ഷ്യമിട്ടാണ് ഈ വേറിട്ട പദ്ധതി.കാഴ്ചയിൽ പഴയ ട്രെയിൻ കോച്ചിന്റെ തനത് രൂപം നിലനിർത്തുമെങ്കിലും, അകത്തേക്ക് കയറിയാൽ ആധുനിക ഡൈനിംഗ് സൗകര്യങ്ങളാണ് ഭക്ഷണപ്രേമികളെ കാത്തിരിക്കുന്നത്:
മരം കൊണ്ടുള്ള ആകർഷകമായ ഇന്റീരിയർ ഡിസൈൻ ആയിരിക്കും ഉണ്ടാകുക. വിവിധ തരം മൾട്ടി-ക്യൂസീൻ വിഭവങ്ങൾ ഇവിടെ ലഭ്യമാകും.
ആധുനിക രീതിയിലുള്ള അടുക്കള, കൃത്യമായ മാലിന്യ നിർമാർജന സംവിധാനം, സുരക്ഷാ ക്രമീകരണങ്ങൾ എന്നിവ റെസ്റ്ററനന്റിന്റെ ഭാഗമായി ഒരുക്കും.
മട്ടാഞ്ചേരിക്ക് പുറമെ കേരളത്തിലെ മറ്റ് സ്റ്റേഷനുകളിലേക്കും ഈ പദ്ധതി വ്യാപിപ്പിക്കാൻ റെയിൽവേക്ക് പദ്ധതിയുണ്ട്. പാലക്കാട് ഡിവിഷന് കീഴിൽ ഇതിനുള്ള ഒരുക്കങ്ങൾ പുരോഗമിക്കുകയാണ്. കണ്ണൂർ പയ്യന്നൂർ സ്റ്റേഷനിൽ മൂന്ന് പഴയ കോച്ചുകൾ ഉപയോഗിച്ച് വലിയൊരു ഹെറിറ്റേജ് റെസ്റ്ററന്റ് ആരംഭിക്കാനാണ് റെയിൽവേ ലക്ഷ്യമിടുന്നത്.
ഇനി മുതൽ ട്രെയിൻ കയറാൻ മാത്രമല്ല, നല്ല ഒന്നാന്തരം ഫുഡ് കഴിക്കാനും യാത്രക്കാർക്ക് റെയിൽവേ സ്റ്റേഷനുകളിലേക്ക് വരാമെന്ന അവസ്ഥയാണ് ഈ പദ്ധതിയിലൂടെ യാഥാർഥ്യമാകുന്നത്.
