ഗുജറാത്തിലെ ദാഹോദ് ജില്ലയിൽ രണ്ട് തലയും നാല് കണ്ണുകളുമുള്ള അത്യപൂർവ്വമായ പാമ്പിനെ കണ്ടെത്തി. ഏകദേശം 6 ഇഞ്ച് മാത്രം നീളമുള്ള കുഞ്ഞൻ പാമ്പിനെയാണ് കൃഷിയിടത്തിൽ നിന്നും രക്ഷപ്പെടുത്തിയത്.
ധാൻപൂർ താലൂക്കിലെ അഗസ്വാനി ഗ്രാമത്തിലെ പാടത്താണ് ഈ അപൂർവ്വ കാഴ്ച കണ്ടത്. നാട്ടുകാരുടെ വിവരമനുസരിച്ച് സ്ഥലത്തെത്തിയ ‘പ്രകൃതി മിത്ര മണ്ഡൽ’ പ്രവർത്തകർ പാമ്പിനെ സുരക്ഷിതമായി പിടികൂടുകയായിരുന്നു. പരിശോധനയിൽ ഇതൊരു ‘വൂൾഫ് സ്നേക്’ വിഭാഗത്തിൽ പെട്ട പാമ്പാണെന്ന് തിരിച്ചറിഞ്ഞു. വിഷമില്ലാത്തതും മനുഷ്യർക്ക് അപകടകാരിയല്ലാത്തതുമായ ഇനമാണിത്.
ശാസ്ത്രീയമായി ‘ബൈസെഫലി’ (Bicephaly) എന്നാണ് ഈ അവസ്ഥ അറിയപ്പെടുന്നത്. ഭ്രൂണവളർച്ചയുടെ ഘട്ടത്തിൽ പൂർണമായി വേർപെടാതെ പോകുന്നതുകൊണ്ട് ഒരൊറ്റ ശരീരത്തിൽ രണ്ട് തലകൾ രൂപപ്പെടുന്ന പ്രതിഭാസമാണിത്. ഇതിന്‍റെ രണ്ട് തലകൾക്കും വെവ്വേറെ കണ്ണുകളും സ്വന്തമായ നാഡീവ്യൂഹവുമുണ്ട്.
ഗുജറാത്തിൽ ഇത്തരത്തിലുള്ള ഒരു സംഭവം റിപ്പോർട്ട് ചെയ്യപ്പെടുന്നത് ഇതാദ്യമാണ്. ഇന്ത്യയിൽ ഇതിനുമുമ്പ് ചുരുക്കം ചില സന്ദർഭങ്ങളിൽ മാത്രമാണ് ഇത്തരത്തിലുള്ള പാമ്പുകളെ കണ്ടെത്തിയിട്ടുള്ളത്. രണ്ട് തലകളും വ്യത്യസ്ത രീതിയിൽ പ്രവർത്തിക്കുന്നത് ഇത്തരം ജീവികൾക്ക് കാട്ടിൽ ഇരതേടുന്നതിനും ജീവൻ നിലനിർത്തുന്നതിനും വലിയ വെല്ലുവിളിയാകാറുണ്ട്. നിലവിൽ വനംവകുപ്പിന്റെയും വിദഗ്ധരുടെയും നിരീക്ഷണത്തിലും സംരക്ഷണത്തിലുമാണ് ഈ അപൂർവ്വ പാമ്പ്.
