പ്രായം ഒരിക്കലും ഒരു തടസമല്ലെന്ന് തെളിയിച്ചിരിക്കുകയാണ് 61 കാരിയായ കനേഡിയൻ വനിത. അബ്ഡോമിനൽ പ്ലാങ്ക് പൊസിഷനിൽ 5 മണിക്കൂർ പൂർത്തിയാക്കിയാണ് ഡോണജീൻ വൈൽഡ് പുതിയ ലോക റിക്കാർഡ് സ്വന്തമാക്കിയത്. വേൾഡ് സീനിയർ ഗെയിംസിൽ വെച്ചാണ് ഈ ചരിത്രനേട്ടം.
കഠിനമായ ഈ വ്യായാമ മുദ്രയിൽ മണിക്കൂറുകളോളം അനങ്ങാതെ ഉറച്ചുനിന്ന ഡോണജീനെ വേദനിറയെ നിറഞ്ഞ കൈയടിയോടെയാണ് കാണികൾ സ്വാഗതം ചെയ്തത്. 5 മണിക്കൂർ എന്ന കഠിനമായ ദൗത്യം വിജയകരമായി പൂർത്തിയാക്കിയപ്പോൾ വലിയൊരു പുഞ്ചിരിയോടെയാണ് അവർ വിജയം ആഘോഷിച്ചത്. ചെറുപ്പക്കാർക്ക് പോലും ഏറെ ബുദ്ധിമുട്ടേറിയതാണ് ഈ കായിക സാഹസം.
ഡോണജീൻ വൈൽഡിന്‍റെ ആദ്യ റിക്കാർഡല്ലിതെന്നതാണ് മറ്റൊരു പ്രത്യേകത. ഇതിനുമുമ്പ് 2024 മാർച്ച് 21ന് കാനഡയിലെ ആൽബർട്ടയിൽ 4 മണിക്കൂറും 30 മിനിറ്റും 11 സെക്കൻഡും പ്ലാങ്ക് ചെയ്ത് അവർ ഗിന്നസ് ലോക റിക്കാർഡ് സ്വന്തമാക്കിയിരുന്നു.
പ്രായത്തെയും വെല്ലുവിളികളെയും അതിജീവിച്ചുള്ള അവരുടെ ഈ അസാധാരണമായ കരുത്തും ദൃഢനിശ്ചയവും സമൂഹമാധ്യമങ്ങളിലും വലിയ രീതിയിൽ ചർച്ചയായിട്ടുണ്ട്. നിരവധിപ്പേരാണ് ഈ വയോധികയുടെ ആത്മവിശ്വാസത്തെ അഭിനന്ദിച്ച് രംഗത്തെത്തിയത്.
