റോഡിൽ അപകടനടപടികളുമായി വീണ്ടും ഇൻസ്റ്റഗ്രാം റീൽ പ്രേമികൾ. ജയ്പൂരിലെ പ്രധാന ജങ്ഷനിൽ കറുത്ത മഹീന്ദ്ര ഥാർ വട്ടമിട്ടു കറക്കി അഭ്യാസം നടത്തുന്നതിന്‍റെ ദൃശ്യങ്ങൾ പുറത്തുവന്നു. റീൽസ് ചിത്രീകരിക്കാൻ അതിസാഹസികമായി വാഹനത്തിന് തൊട്ടടുത്ത് നിന്ന യുവാവ് അത്ഭുതകരമായാണ് വണ്ടിയിടിക്കാതെ രക്ഷപ്പെട്ടത്.
വൈശാലി നഗറിലെ അമ്രപാലി സർക്കിളിൽ വെള്ളിയാഴ്ച പുലർച്ചെ 5.30 ഓടെയാണ് സംഭവം. വാഹനങ്ങൾ കുറവുള്ള സമയം നോക്കി കറുത്ത ഥാർ ജങ്ഷനിൽ പത്തോളം തവണയാണ് അതിവേഗത്തിൽ കറക്കിയത്.
വാഹനത്തിന് തൊട്ടടുത്ത് നിന്ന് റീൽസ് റെക്കോർഡ് ചെയ്യുകയായിരുന്ന യുവാവിന് നേരെ നിയന്ത്രണം വിട്ടതുപോലെ ഥാർ പാഞ്ഞടുത്തെങ്കിലും അയാൾ പെട്ടെന്ന് മാറിനിൽക്കുകയായിരുന്നു.
വീഡിയോ വൈറലായതോടെ വൈശാലി നഗർ പൊലീസ് കേസ് എടുത്തു. പ്രദേശത്തെ സിസിടിവി ദൃശ്യങ്ങൾ പരിശോധിച്ച് വരികയാണെന്നും വാഹനത്തിന്‍റെ രജിസ്ട്രേഷൻ നമ്പർ കേന്ദ്രീകരിച്ച് ഡ്രൈവർക്കായി തിരച്ചിൽ ശക്തമാക്കിയതായും പൊലീസ് അറിയിച്ചു.
