ജൂലൈ മാസത്തിലെ സിജെപി പ്രക്ഷോഭങ്ങളിലൂടെ സോഷ്യൽ മീഡിയയിൽ ഏറെ ശ്രദ്ധിക്കപ്പെട്ട യുവമുഖങ്ങൾ വീണ്ടും ഒന്നിക്കുന്നു. ഡൽഹിയിലെ ജന്തർ മന്തറിൽ സംഘടിപ്പിക്കുന്ന പുതിയ പ്രക്ഷോഭത്തിന് മുന്നോടിയായി അഭ്നവ് ബിഷ്ട് തന്‍റെ ഇൻസ്റ്റാഗ്രാം അക്കൗണ്ടിൽ മുഹമ്മദ് ഷാൻ, നിഖിൽ വർമ എന്നിവരോടൊപ്പമുള്ള പുതിയ വീഡിയോ പങ്കുവെച്ചു. “സീസൺ 2 ന് തയ്യാറാണോ” എന്ന അടിക്കുറിപ്പോടെയാണ് ഈ വീഡിയോ പുറത്തുവിട്ടിരിക്കുന്നത്.
കഴിഞ്ഞ ജൂലൈയിൽ നടന്ന നീറ്റ് യുജി പരീക്ഷാ ക്രമക്കേടുകൾക്കെതിരെയുള്ള സമരത്തിനിടയിൽ, പ്രശസ്തമായ ‘ആജ് റുസ്വ തേരി ഗലിയോം മേം’ എന്ന ഗാനത്തിനൊപ്പം ഇവർ ചെയ്ത റീലുകൾ വലിയ രീതിയിൽ വൈറലായിരുന്നു.
ഇത് അഭ്നവ് ബിഷ്ടിന്‍റെ ഫോളോവേഴ്സ് എണ്ണം ലക്ഷക്കണക്കിന് വർധിപ്പിക്കാൻ ഇടയാക്കിയിരുന്നു. പുതിയ വീഡിയോയിലും ഇതേ ഗാനങ്ങളുടെ പശ്ചാത്തലത്തിലാണ് ഇവർ പ്രത്യക്ഷപ്പെട്ടിരിക്കുന്നത്.
മുഖ്യ തെരഞ്ഞെടുപ്പ് കമ്മീഷണർ ജ്യാനേഷ് കുമാറിന്‍റെ രാജി ആവശ്യപ്പെട്ടും, വോട്ടർ പട്ടികയിലെ വിവാദപരമായ തിരുത്തലുകൾക്കെതിരെയും സിജെപി ഒക്ടോബർ 10-ന് ജന്തർ മന്തറിൽ വീണ്ടും സമരത്തിന് ആഹ്വാനം ചെയ്തിരുന്നു.
എന്നാൽ പൊതുസമാധാന അന്തരീക്ഷം തടസപ്പെടാൻ സാധ്യതയുണ്ടെന്ന വിലയിരുത്തലിൽ ഡൽഹി പോലീസ് ഈ ഒത്തുചേരലിന് അനുമതി നിഷേധിച്ചിരിക്കുകയാണ്. എന്തായാലും സമരത്തിനൊപ്പം തന്നെ സമൂഹമാധ്യമങ്ങളിൽ വൈറലായ ഈ കൂട്ടായ്മയുടെ രണ്ടാം വരവ് ഇപ്പോൾ വലിയ ചർച്ചയായിരിക്കുകയാണ്.
