കൊച്ചി: ഡൽഹിയിൽ പ്രതിഷേധവുമായി രംഗത്തിറങ്ങിയ മുഖ്യമന്ത്രി വി.ഡി. സതീശനും പ്രതിപക്ഷ നേതാവ് പിണറായി വിജയനും ആത്മാർഥതയുണ്ടെങ്കിൽ കേരള സർക്കാരിനെ പിരിച്ചുവിടാൻ ഗവർണറോട് സംയുക്തമായി ശിപാർശ ചെയ്യണമെന്ന് ആവശ്യപ്പെട്ട് ട്വന്‍റി 20 സംസ്ഥാന അധ്യക്ഷൻ സാബു എം. ജേക്കബ്.
എസ്‌ഐആർ നടപടികൾ വ്യാജമാണെന്ന് കരുതുന്ന ഇരുവരും അധികാരക്കസേരയിൽ ഒരു നിമിഷം പോലും തുടരാൻ അർഹരല്ലെന്നും, ധൈര്യമുണ്ടെങ്കിൽ ജനവിധി തേടാൻ വീണ്ടും തെരഞ്ഞെടുപ്പിനെ നേരിടാൻ തയാറാകണമെന്നും അദ്ദേഹം വ്യക്തമാക്കി. കേരളത്തിൽ എസ്‌ഐആർ നല്ലതാണെന്നും മറ്റ് സംസ്ഥാനങ്ങളിൽ അത് മോശമാണെന്നുമുള്ള നിലപാട് തികഞ്ഞ കാപട്യവും ജനങ്ങളെ കബളിപ്പിക്കാനുള്ള നാടകവുമാണ്.
കേരളത്തിലെ മുൻ ചീഫ് ഇലക്ടറൽ ഓഫിസർ രത്തൻ യു. ഖേൽക്കറെ മുഖ്യമന്ത്രി വി.ഡി. സതീശൻ തന്‍റെ സെക്രട്ടറിയായി നിയമിച്ചിട്ടുണ്ട്. ഇത്തരത്തിലുള്ള പശ്ചാത്തലമുള്ള ഒരു മുഖ്യമന്ത്രിക്ക് എന്തു ധാർമികതയുടെ പുറത്താണ് ഡൽഹിയിൽ ചെന്ന് സമരം നടത്താൻ സാധിക്കുന്നതെന്നും സാബു എം. ജേക്കബ് ചോദിച്ചു.
ജനങ്ങളെ വഞ്ചിക്കുന്ന കാര്യത്തിൽ പിണറായി വിജയനും വി.ഡി. സതീശനും ഒരേ തൂവൽ പക്ഷികളെപ്പോലെയാണ് പ്രവർത്തിക്കുന്നത്. ഡൽഹിയിൽ നടത്തിയതുപോലെ, കേരളത്തിലും എസ്‌ഐആറിനെതിരെ ഒരുമിച്ച് സമരത്തിനിറങ്ങാൻ ഇരുവരും തയാറാകണമെന്നും അദ്ദേഹം കൂട്ടിച്ചേർത്തു
