പരവൂർ: വേനലവധിക്കാലത്തെ യാത്രക്കാരുടെ തിരക്ക് പരിഗണിച്ച് തിരുവനന്തപുരത്തുനിന്ന് വേളാങ്കണ്ണിയിലേക്ക് പ്രത്യേക ട്രെയിൻ സർവീസുകൾ നടത്തുമെന്ന് ദക്ഷിണ റെയിൽവേ അറിയിച്ചു. മെയ് മാസത്തിലെ മൂന്ന് ബുധനാഴ്ചകളിലായി തിരുവനന്തപുരം നോർത്തിൽ (കൊച്ചുവേളി) നിന്ന് വേളാങ്കണ്ണിയിലേക്കും തിരിച്ച് വ്യാഴാഴ്ചകളിൽ വേളാങ്കണ്ണിയിൽ നിന്ന് തിരുവനന്തപുരത്തേക്കുമാണ് സർവീസ് ക്രമീകരിച്ചിരിക്കുന്നത്.
തിരുവനന്തപുരം നോർത്ത് – വേളാങ്കണ്ണി എക്സ്പ്രസ് സ്പെഷൽ (06031) മെയ് 13, 20, 27 തീയതികളിൽ (ബുധനാഴ്ച) രാവിലെ 11 ന് തിരുവനന്തപുരം നോർത്തിൽ നിന്ന് പുറപ്പെടും. പിറ്റേന്ന് പുലർച്ചെ മൂന്നിന് ട്രെയിൻ വേളാങ്കണ്ണിയിൽ എത്തും. കൊല്ലം (12.30), പുനലൂർ (1.40), ചെങ്കോട്ട (4.50), തെങ്കാശി (5.15) എന്നിങ്ങനെയാണ് പ്രധാന സ്റ്റേഷനുകളിലെ സമയക്രമം. വിരുദുനഗർ, മാനാമധുരൈ, കാരൈക്കുടി, തിരുവാരൂർ, നാഗപട്ടണം വഴി ട്രെയിൻ വേളാങ്കണ്ണിയിലെത്തും.
തിരികെയുള്ള വേളാങ്കണ്ണി – തിരുവനന്തപുരം സെൻട്രൽ എക്സ്പ്രസ് സ്പെഷൽ (06032) മെയ് 14, 21, 28 (വ്യാഴം) തീയതികളിൽ ഉച്ചയ്ക്ക് 12.45-ന് വേളാങ്കണ്ണിയിൽ നിന്ന് പുറപ്പെടും. പിറ്റേന്ന് പുലർച്ചെ 5.45-ന് ട്രെയിൻ തിരുവനന്തപുരം നോർത്തിൽ എത്തും. ഈ ട്രെയിൻ പുലർച്ചെ 1.05-ന് പുനലൂരിലും 2.35-ന് കൊല്ലത്തും എത്തും.
രണ്ട് എസി ടു ടയർ കോച്ചുകൾ, രണ്ട് എസി ത്രീ ടയർ കോച്ചുകൾ, മൂന്ന് എസി ത്രീ ടയർ ഇക്കോണമി കോച്ചുകൾ, ആറ് സ്ലീപ്പർ ക്ലാസ് കോച്ചുകൾ, നാല് സെക്കൻഡ് ക്ലാസ് ജനറൽ കോച്ചുകൾ എന്നിവയടങ്ങുന്നതാണ് ട്രെയിനിന്റെ ഘടന. വേളാങ്കണ്ണി തീർഥാടകർക്കും തമിഴ്നാടിന്റെ വിവിധ ഭാഗങ്ങളിലേക്കും യാത്ര ചെയ്യുന്നവർക്ക് ഈ പ്രത്യേക സർവീസ് വലിയ ആശ്വാസമാകുമെന്നാണ റെയിൽവേ അധികൃതരുടെ വിലയിരുത്തൽ.
