മുംബൈ ഭയന്ദർ ക്രീക്ക് റെയിൽവേ പാലത്തിൽ യുവാക്കൾ അപകടകരമായ രീതിയിൽ അഭ്യാസപ്രകടനങ്ങൾ നടത്തുകയും ഗ്രാഫിറ്റി വരയ്ക്കുകയും ചെയ്യുന്ന വീഡിയോ സോഷ്യൽ മീഡിയയിൽ വൈറലാകുന്നു. ഏണി ഉപയോഗിച്ച് പാലത്തിനടിയിലേക്ക് ഇറങ്ങുന്ന യുവാക്കൾ, താഴെ പുഴയൊഴുകുന്ന റെയിലിംഗിൽ തൂങ്ങിക്കിടന്ന് സർക്കസ് അഭ്യാസങ്ങൾ നടത്തുന്നതാണ് ദൃശ്യങ്ങളിലുള്ളത്.
റെയിൽവേ സ്വത്തിന് കേടുപാടുകൾ വരുത്തുകയും ജീവൻ അപകടത്തിലാക്കുകയും ചെയ്ത യുവാക്കൾക്കെതിരെ കർശന നടപടി ആവശ്യപ്പെട്ട് നിരവധി പേരാണ് രംഗത്തെത്തിയത്. സംഭവം ശ്രദ്ധയിൽപ്പെട്ടതോടെ റെയിൽവേയുടെ ഔദ്യോഗിക അക്കൗണ്ടായ ‘റെയിൽവേ സേവ’ വിഷയത്തിൽ ഇടപെടുകയും, 139 നമ്പറിലോ ‘റെയിൽമദദ്’ പോർട്ടലിലോ പരാതി നൽകാൻ ആവശ്യപ്പെടുകയും ചെയ്തു.
ഇൻസ്റ്റാഗ്രാമിൽ പ്രചരിച്ച ഈ വീഡിയോ എഐ ഉപയോഗിച്ച് നിർമിച്ചതാണെന്ന് അപ്ലോഡ് ചെയ്തയാൾ അവകാശപ്പെടുന്നുണ്ടെങ്കിലും ഇതിൽ ഔദ്യോഗിക സ്ഥിരീകരണമില്ല. അതീവ സുരക്ഷാ മേഖലയായ റെയിൽവേ പാലത്തിൽ ആളുകൾ അതിക്രമിച്ചു കയറിയ സംഭവത്തിൽ അന്വേഷണം നടക്കുകയാണ്.
