കണ്ണൂർ: വളപട്ടണത്ത് മയക്കുമരുന്ന് വേട്ട. വില്പനയ്ക്കായി എത്തിച്ച 29.66 ഗ്രാം എംഡിഎംഎ പിടികൂടി. സംഭവുമായി ബന്ധപ്പെട്ട് ആറംഗസംഘത്തെ വളപട്ടണം പോലീസും ഡാൻസാഫ് ടീമും പിടികൂടി. കണ്ണൂർ-കാസർഗോഡ് ജില്ലകളിലെ പ്രധാനപ്പെട്ട ലഹരി ഇടപാട് സംഘമാണ് പിടിയിലായതെന്ന് പോലീസ് പറഞ്ഞു. ഇന്നലെ ഉച്ചകഴിഞ്ഞ് 3.15 ഓടെ ഡാൻസാഫിന് ലഭിച്ച രഹസ്യവിവരത്തെ തുടർന്നായിരുന്നു വളപട്ടണം പോലീസും ഡാൻസാഫ് സ്ക്വാഡും ചേർന്ന് റെയ്ഡ് നടത്തിയത്.
വളപട്ടണം ടോൾബൂത്തിനടുത്തുള്ള കെട്ടിടത്തിലെ റൂമിൽ നിന്നാണ് ആറംഗസംഘം പിടിയിലായത്. കണ്ണാടിപ്പറന്പ് സ്വദേശികളായ കെ. മുബഷീർ (20), കെ.എം. ഷനാദ് (19), പള്ളിപ്പറന്പിലെ എം.കെ. മുഹമ്മദ് (40), കാഞ്ഞങ്ങാട് സ്വദേശി കെ. അബ്ദുൾ നാസർ (33), ചേലേരിയിലെ സി.പി. മുഹമ്മദ് (45), മൂളിയാർ സ്വദേശി മുഹമ്മദ് ഷമീർ (28) എന്നിവരാണ് പിടിയിലായത്.
വളപട്ടണം എസ്ഐ വി.ആർ. അരുൺ, ഗ്രേഡ് എസ്ഐ മഹേഷ്കുമാർ, സിപിഒമാരായ നവീൻ, ശരത്, ഡാൻസാഫ് സ്ക്വാഡ് എഎസ്ഐ അജിത്ത്, ടീം അംഗങ്ങളായ സിപിഒ എം.കെ. പ്രവീഷ്, സീനിയർ സിപിഒ കെ. വിനു, ഗ്രേഡ് എഎസ്ഐ കെ.വി. മഹേഷ് എന്നിവർ ചേർന്നാണ് പ്രതികളെ പിടികൂടിയത്.
