പ്രായമായ സഞ്ചാരികളുടെ ആത്മവീര്യവും നിശ്ചയദാർഢ്യവും വിളിച്ചോതുന്ന ഒരു സോഷ്യൽ മീഡിയ പോസ്റ്റാണ് ഇപ്പോൾ വലിയ ശ്രദ്ധ നേടുന്നത്. ജീവിതം പൂർണ്ണമായി ആസ്വദിക്കുന്നതിനെക്കുറിച്ചുള്ള ലളിതവും എന്നാൽ ശക്തവുമായ സന്ദേശമാണ് ഇതിലൂടെ പങ്കുവച്ചിരിക്കുന്നത്.
ജിനി ജാല എന്ന ഇൻസ്റ്റാഗ്രാം ഉപയോക്താവാണ് തന്റെ കേദാർനാഥ് യാത്രയ്ക്കിടെ പരിചയപ്പെട്ട രണ്ട് വയോധികരായ സഹോദരിമാരെക്കുറിച്ചുള്ള ഒു പോസ്റ്റ് പങ്കുവച്ചത്. താൻ കണ്ടുമുട്ടിയ സ്ത്രീകൾക്ക് 70 വയസ്സിനു മുകളിൽ പ്രായമുണ്ടെന്നും എന്നാൽ അവരുടെ വീര്യം ഒട്ടും കുറഞ്ഞിട്ടില്ലെന്ന അടികുറപ്പോടെയാണ് ജിനി പോസ്റ്റ് പങ്കുവച്ചത്.
കേദാർനാഥിലേക്കുള്ള യാത്രാമധ്യേയാണ് ഈ അത്ഭുതപ്പെടുത്തുന്ന സ്ത്രീകളെ കണ്ടുമുട്ടിയതെന്ന് ജിനി പറഞ്ഞു. ഒഴികഴിവുകളോ പരിധികളോ ഇല്ലാതെ, ജീവിക്കാനും യാത്ര ചെയ്യാനും മുന്നോട്ട് നീങ്ങാനുമുള്ള തീക്ഷ്ണമായ ആഗ്രഹം മാത്രമാണ് അവരിലുള്ളതെന്ന് ജിനി ചൂണ്ടിക്കാട്ടി.
“ശരിയായ സമയത്തിനായി” കാത്തിരിക്കുമ്പോൾ, ഈ സഹോദരിമാർ വർത്തമാനകാലത്തിൽ ജീവിക്കാൻ തെരഞ്ഞെടുത്തു എന്ന് പോസ്റ്റിൽ പറയുന്നുണ്ട്. ജിനി ജാല തന്റെ കാമറയിൽ യാത്രയ്ക്കിടെയിൽ സ്ത്രീകളുടെ ദൃശ്യങ്ങൾ പകർത്തി. പ്രായം വകവെക്കാതെ ട്രെക്കിംഗിനോടുള്ള തങ്ങളുടെ ഇഷ്ടത്തെക്കുറിച്ച് വീഡിയോയിൽ അവർ സംസാരിക്കുന്നുണ്ട്. ഈ സ്ത്രീകളുടെ ഊർജ്ജസ്വലത സോഷ്യൽ മീഡിയ ഉപയോക്താക്കളെ വളരെയധികം ആകർഷിച്ചു. “മനോഹരമായ ആത്മാക്കൾ, വളരെ പ്രചോദനം നൽകുന്നത്, എനിക്കും അവരെപ്പോലെ ആകണം, എന്നുമുള്ള അഭിപ്രായങ്ങളാണ് കമന്റ് ബോക്സിൽ പ്രത്യക്ഷപ്പെട്ടത്.
