ഇടുക്കി: മേയ് ഒന്നിന് നടക്കുന്ന മംഗളാദേവി ചിത്രാപൗര്ണമി ഉത്സവത്തിന്റെ സുഗമമായ നടത്തിപ്പിനുള്ള ക്രമീകരണങ്ങള് പുരോഗമിക്കുന്നു. പെരിയാര് കടുവ സങ്കേതത്തില് സ്ഥിതിചെയ്യുന്ന മംഗളാദേവി ക്ഷേത്രത്തിലെ ചിത്രാപൗര്ണമി ഉത്സവത്തില് പങ്കെടുക്കാനെത്തുന്ന ഭക്തര്ക്ക് രാവിലെ ആറ് മുതല് പ്രവേശനം അനുവദിക്കും.
ഉച്ചയ്ക്ക് 2.30നുശേഷം വനത്തിനുള്ളിലേക്ക് കടത്തിവിടില്ല. ദര്ശനം കഴിഞ്ഞ് വൈകുന്നേരം അഞ്ചോടെ എല്ലാ ഭക്തരും വനമേഖലയില്നിന്ന് തിരിച്ചിറങ്ങണം. രാത്രി വനത്തിനുള്ളില് തങ്ങാന് ആരെയും അനുവദിക്കില്ല.
കുമളി ബസ് സ്റ്റാന്ഡില്നിന്ന് ഭക്തരെ കൊണ്ടുപോകുന്ന ട്രിപ്പ് ജീപ്പുകള്ക്ക് രാവിലെ 5.30 മുതല് ഉച്ചയ്ക്ക് 1.45 വരെ പ്രവേശനം അനുവദിക്കും. ഇരുചക്ര വാഹനങ്ങള്ക്കും ട്രാക്ടറുകള്ക്കും കര്ശന നിരോധനമുണ്ട്. ഒരു വശത്തേക്കുള്ള യാത്രയ്ക്ക് 200 രൂപയാണ് ട്രിപ്പ് ജിപ്പുകള്ക്ക് വാടക നിശ്ചയിച്ചിരിക്കുന്നത്.
