കൊച്ചി: ദീപക് ജോയി തൃപ്പൂണിത്തുറ മണ്ഡലത്തില് നിന്ന് നിയമസഭയിലേക്ക് തെരഞ്ഞെടുക്കപ്പെട്ടതോടെ കൊച്ചി കോര്പറേഷനില് ഡെപ്യൂട്ടി മേയര് സ്ഥാനത്തേക്ക് പുതിയ ആളെ കണ്ടെത്തണം. അര ഡസനോളം ആളുകളുടെ പേരുകളാണ് ഇപ്പഴേ ഉയര്ന്ന് കേള്ക്കുന്നത്. ടേം വ്യവസ്ഥയില് ആദ്യ രണ്ടര വര്ഷം ഡെപ്യൂട്ടി മേയര് സ്ഥാനം കോണ്ഗ്രസിലെ എ ഗ്രൂപ്പിന് ആയതിനാല് പുതിയ ആളെയും എ ഗ്രൂപ്പില് നിന്ന് കണ്ടെത്തണം.
കലൂര് സൗത്തില് നിന്നുള്ള കൗണ്സിലര് എം.ജി. അരിസ്റ്റോട്ടില്, വടുതല വെസ്റ്റില് നിന്നുള്ള ഹെന്ട്രി ഓസ്റ്റിന്, എളമക്കര സൗത്തില് നിന്നുള്ള വി.ആര്. സുധീര്, പെരുമാനൂരില് നിന്നുള്ള കെ.എക്സ്. ഫ്രാന്സിസ് എന്നിവരുടെ പേരുകളാണ് എ ഗ്രൂപ്പില് നിന്ന് ഉയര്ന്ന് കേള്ക്കുന്നത്. കെ.സി. വേണുഗോപാല് പക്ഷക്കാരനായ പി.ഡി. മാര്ട്ടിനും സാധ്യത പട്ടികയിലുണ്ട്. നേരത്തെ ഐ ഗ്രൂപ്പിന്റെ ഭാഗമായി നിന്ന് കെ.സി ഇപ്പോള് എ ഗ്രൂപ്പിലേക്ക് ചുവടുമാറിയതോടെ ഗ്രൂപ്പ് തടസം മാര്ട്ടിനെ ബാധിക്കുകയുമില്ല.
സാമുദായിക സമവാക്യങ്ങള് പരിഗണിക്കുമ്പോള് ഈഴവ വിഭാഗത്തില് നിന്നുള്ള സുധീറിനാണ് കൂടുതല് സാധ്യത. ദീപക് ജോയിയും ഇഴവ വിഭാഗക്കാരനാണ്. മറ്റുള്ളവര് ക്രിസ്ത്യന് വിഭാഗക്കാരാണ്. ഇതില് അരിസ്റ്റോട്ടില്, ഫ്രാന്സിസ്, ഹെന്ട്രി എന്നിവര് ലത്തീന് സമുദായംഗങ്ങളും മാര്ട്ടിന് സിറിയന് കത്തോലിക്കനുമാണ്.
ടേം വ്യവസ്ഥയുള്ളതിനാല് രണ്ടര വര്ഷത്തിന് ശേഷം ഐ ഗ്രൂപ്പിന് ഡെപ്യൂട്ടി മേയര് പദവി കൈമാറണം. രണ്ട് വര്ഷമാണ് എ ഗ്രൂപ്പിനു ശേഷിക്കുന്നത്. തുടര്ന്ന് ഐ ഗ്രൂപ്പുകാരനായ കെ.വി.പി. കൃഷ്ണകുമാര് ഡെപ്യൂട്ടി മേയറാകും. ദീപക് ജോയി കൗണ്സിലര് സ്ഥാനം രാജിവയ്ക്കുന്നതോടെ അയ്യപ്പന്കാവ് ഡിവിഷനില് ആറ് മാസത്തിനുള്ളില് ഉപതെരഞ്ഞെടുപ്പ് വരും.
