ഇന്ത്യക്കാർ എവിടെ പോയാലും അവിടെ ഒരു ‘മിനി ഇന്ത്യ’ സൃഷ്ടിക്കുമെന്ന് പറയാറുണ്ട്. അക്ഷരാർഥത്തിൽ അത് തെളിയിക്കുന്നൊരു വീഡിയോ ആണിപ്പോൾ സോഷ്യൽ മീഡിയയിൽ വൈറലാകുന്നത്. ബ്രിട്ടണിലെ ഒരു സ്ട്രീറ്റിലാണ് ഇന്ത്യയെന്ന് തോന്നിക്കും വിധമൊരു കടയുള്ളത്. തമാശരൂപേണ ‘പഞ്ചാബ് 2.0’ എന്നാണ് ആളുകൾ ഇതിനെ വിശേഷിപ്പിക്കുന്നത്.
പഞ്ചാബി പാട്ടുകളും അവിടുള്ള കടകൾക്ക് സമാനമായ ചെറിയ കെട്ടിടങ്ങളുമൊക്കെ കണ്ടാൽ ഇത് ബ്രിട്ടനാണെന്ന് വിശ്വസിക്കാൻ തീർത്തും പ്രയാസമാണ്.
“എന്നെ വിശ്വസിക്കൂ, ഇത് പഞ്ചാബ് അല്ല, ഇത് യുണൈറ്റഡ് കിംഗ്ഡമാണ്” എന്ന അടിക്കുറിപ്പോടെ ഒരു ഇന്ത്യൻ വംശജൻ ഈ വീഡിയോ പങ്കുവച്ചു. ഏഷ്യക്കാർ ധാരാളമായി താമസിക്കുന്ന ലണ്ടനിലെ പ്രശസ്തമായ സൗത്തോൾ പോലുമല്ല ഈ പ്രദേശം എന്നതാണ് ഏറ്റവും ശ്രദ്ധേയമായ കാര്യം.
പഞ്ചാബി ഗായകൻ സിദ്ധു മൂസവാലയുടെ ചിത്രങ്ങളും അവിടുത്തെ തിരക്കും കണ്ട സോഷ്യൽ മീഡിയ ഉപയോക്താക്കൾ ആകെ ഞെട്ടലിലാണ്. ഇതിന്റെ വീഡിയോ വൈറലായതോടെ ആളുകളുടെ കമന്റിന്റെ തിരക്കായിരുന്നു. “റിവേഴ്സ് കൊളോണിയലിസം” എന്നാണ് പലരും ഇതിനെ വിളിച്ചത്. ഒരു നിമിഷം ബ്രിട്ടനായും അടുത്ത നിമിഷം പഞ്ചാബായും തോന്നിപ്പിക്കുന്ന ഈ വീഡിയോ അതുകൊണ്ട് തന്നെ വീണ്ടും വീണ്ടും കാണാൻ ആളുകളെ പ്രേരിപ്പിക്കുകയാണ്.
