മുകേഷ് അംബാനിയുടെ മുംബൈയിലെ വസതിയായ ‘അന്തിലിയയിൽ’ നടന്ന ഗണേശ ചതുർഥി ആഘോഷങ്ങൾക്കിടെ മനംകവരുന്ന നൃത്ത പ്രകടനവുമായി രാധിക മെർച്ചന്റ്. ഗണപതി വിഗ്രഹത്തിന് മുന്നിൽ നർത്തകർക്കൊപ്പം രാധിക നടത്തിയ മനോഹരമായ നൃത്തത്തിന്റെ വീഡിയോയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
ഐഐഎഫ്എ തങ്ങളുടെ ഇൻസ്റ്റാഗ്രാം പേജിലൂടെ പങ്കുവെച്ച ഈ വീഡിയോയിൽ, തിളങ്ങുന്ന പരമ്പരാഗത വസ്ത്രമണിഞ്ഞ് ശാസ്ത്രീയ നൃത്ത ശൈലിയിലാണ് രാധിക പ്രത്യക്ഷപ്പെടുന്നത്.
ഗണപതി ഭഗവാനോടുള്ള ഭക്തിയും സമർപ്പണവും നിറഞ്ഞ രാധികയുടെ നൃത്തത്തിലെ ലളിതസുന്ദരമായ ഭാവങ്ങളും ചലനങ്ങളുമാണ് കാണികളുടെ മനംകവർന്നത്. അംബാനി കുടുംബത്തിലെ ഇളയ മരുമകളുടെ ഈ പ്രകടനത്തെ നീതാ അംബാനിയുടെ നൃത്ത ശൈലിയോടാണ് പലരും സോഷ്യൽ മീഡിയയിൽ ഉപമിച്ചത്.
“ഗണപതി ഭഗവാനായി സമർപ്പിച്ച ഹൃദയസ്പർശിയായ പ്രണാമം. ഭക്തിയുടെയും സൗന്ദര്യത്തിന്റെയും ഗണേശോത്സവ ആവേശത്തിന്റെയും ഒത്തുചേരൽ!” – വീഡിയോ പങ്കുവെച്ചുകൊണ്ട് ഐഐഎഫ്എ കുറിച്ചു. രാധികയോടൊപ്പം കളങ്കമറ്റ രീതിയിൽ നൃത്തം ചെയ്ത പശ്ചാത്തല നർത്തകർക്കും സോഷ്യൽ മീഡിയയിൽ മികച്ച പ്രശംസ ലഭിക്കുന്നുണ്ട്.
2024 ജൂലൈയിലാണ് മുകേഷ് അംബാനിയുടെയും നീതാ അംബാനിയുടെയും ഇളയ മകൻ അനന്ത് അംബാനിയുമായി രാധിക മെർച്ചന്റിന്റെ വിവാഹം നടന്നത്. ന്യൂയോർക്ക് യൂണിവേഴ്സിറ്റിയിൽ നിന്ന് വിദ്യാഭ്യാസം പൂർത്തിയാക്കിയ രാധിക, തങ്ങളുടെ കുടുംബ വ്യവസായമായ ‘എൻകോർ ഹെൽത്ത്കെയറിലും’ സാംസ്കാരിക പ്രവർത്തനങ്ങളിലും സജീവമാണ്.
