ഡിജെ നൈറ്റുകളിലും ക്ലബ്ബുകളിലും ആളുകൾ നൃത്തം ചെയ്യുന്നത് സാധാരണ കാഴ്ചയാണ്. എന്നാൽ നിത്യോപയോഗ സാധനങ്ങൾ വാങ്ങാൻ കയറുന്ന ഒരു ഗ്രോസറി സ്റ്റോറിൽ ഒരു ഡിജെ പാർട്ടിയും ഉപഭോക്താക്കളുടെ ഡാൻസും നടന്നാലോ? അത്തരമൊരു വേറിട്ട സംഭവത്തിനാണ് ഗുജറാത്തിലെ അഹമ്മദാബാദ് നഗരം സാക്ഷ്യം വഹിച്ചത്.
സൂപ്പർമാർക്കറ്റിന്‍റെ നടുവിൽ തയ്യാറാക്കിയ പ്രത്യേക സ്റ്റേജിൽ വനിതാ ഡിജെ സംഗീതം പൊഴിച്ചപ്പോൾ, സാധനങ്ങൾ വാങ്ങാനെത്തിയ ഉപഭോക്താക്കൾ ട്രോളികൾ മാറ്റിവെച്ച് തകർപ്പൻ നൃത്തം ചെയ്യുകയായിരുന്നു. ഇതിന്‍റെ വീഡിയോ ഇപ്പോൾ സോഷ്യൽ മീഡിയയിൽ വൻതോതിൽ വൈറലായിരിക്കുകയാണ്.
ശിവാനി ജയ്സ്വാൾ എന്ന ഇൻസ്റ്റഗ്രാം ഉപയോക്താവാണ് ഈ അപ്രതീക്ഷിത “സൂപ്പർമാർക്കറ്റ് റേവ്” പാർട്ടിയുടെ വീഡിയോ പങ്കുവെച്ചത്. “അഹമ്മദാബാദ് വട്ടാണ്…” എന്ന അടിക്കുറിപ്പോടെ പങ്കുവെച്ച വീഡിയോ നിമിഷങ്ങൾക്കകം ആളുകളുടെ ശ്രദ്ധപിടിച്ചുപറ്റി.
വീഡിയോ പുറത്തുവന്നതോടെ രസകരമായ പ്രതികരണങ്ങളുമായി നിരവധിയാളുകളാണ് രംഗത്തെത്തിയത്. ഐഐഎംഎയ്ക്ക് സമീപം മുട്ട മാഗി കഴിക്കാൻ മാത്രം പോയിരുന്ന പഴയ അഹമ്മദാബാദിന് എന്തുപറ്റിയെന്ന് ചിലർ തമാശയായി ചോദിച്ചപ്പോൾ, ഞായറാഴ്ചത്തെ ഉച്ചഭക്ഷണത്തിന് കാബേജ് വാങ്ങാൻ വന്ന് പാർട്ടി കണ്ട് സാധനം വാങ്ങാതെ മടങ്ങേണ്ടി വന്ന പാവം ഉപഭോക്താവിന്‍റെ അവസ്ഥയെക്കുറിച്ചായിരുന്നു മറ്റു ചിലരുടെ കമന്‍റുകൾ.
