മകന്റെ ഭാവി ഓർത്ത് സ്വന്തം ശരീരത്തിലെ കഠിനമായ വേദനകൾ പോലും മറന്ന് വിജയംവരെ ഓടിയെത്തിയ ഒരു അച്ഛനാണ് സമൂഹ മാധ്യമങ്ങളിൽ നിറയുന്നത്. അൻപത്തിമൂന്നാം വയസിലും ദേവാംഗ് ഗാന്ധിയാണ് തന്റെ ഭിന്നശേഷിക്കാരനായ മകൻ രുദ്രയ്ക്ക് വേണ്ടി മുംബൈയിൽ നടന്ന അതികഠിനമായ ‘ഹൈറോക്സ്’ ഫിറ്റ്നസ് റേസ് പൂർത്തിയാക്കി ലോകത്തിന് മാതൃകയായത്.
തന്റെ മരണശേഷവും മകന് തണലാകാൻ മറ്റാരുമില്ലെന്ന തിരിച്ചറിവാണ് ദേവാംഗിനെ ഫിറ്റ്നസിന്റെ ലോകത്തേക്ക് നയിച്ചത്. 2024ൽ ഫിറ്റ്നസ് യാത്ര ആരംഭിച്ച അദ്ദേഹം 18 മാസം കൊണ്ട് 30 കിലോഗ്രാം ഭാരമാണ് കുറച്ചത്. “എനിക്ക് മകനേക്കാൾ കൂടുതൽ കാലം ജീവിക്കണം, അവനെ പരിപാലിക്കണം. ഈ ഫിറ്റ്നസ് യാത്ര എനിക്കുവേണ്ടിയല്ല, എന്റെ മകൻ രുദ്രയ്ക്ക് വേണ്ടിയാണ്,” എന്ന് ദേവാംഗ് വീഡിയോയിൽ പറയുന്നു.
എന്നാൽ, മുംബൈയിൽ നടന്ന മത്സരത്തിനിടയിൽ ദേവാംഗിന്റെ കാലിന് കഠിനമായ പേശിവലിവ് അനുഭവപ്പെടുകയും തുടർന്ന് അദ്ദേഹത്തെ മെഡിക്കൽ റൂമിലേക്ക് മാറ്റുകയും ചെയ്തു. മത്സരം തുടരുന്നത് അപകടമാണെന്ന് ഡോക്ടർമാർ മുന്നറിയിപ്പ് നൽകിയെങ്കിലും, മകനെക്കുറിച്ചുള്ള ചിന്ത അദ്ദേഹത്തിന് വീണ്ടും ശക്തി നൽകി. വേദന കടിച്ചമർത്തി മത്സരരംഗത്തേക്ക് തിരിച്ചെത്തിയ ദേവാംഗ് ഒടുവിൽ ഫിനിഷിംഗ് ലൈൻ തൊടുകതന്നെ ചെയ്തു.
‘സ്പോർട്സ് ലാബ് ഓഫ് മാസ്റ്റേഴ്സ് യൂണിയൻ’ ഇൻസ്റ്റാഗ്രാമിൽ പങ്കുവെച്ച ഈ വീഡിയോ ഇതിനകം 17 ലക്ഷത്തിലധികം ആളുകളാണ് കണ്ടത്. ഒരു പിതാവിന്റെ സ്നേഹത്തിന്റെയും ആത്മവിശ്വാസത്തിന്റെയും അടയാളമായ ഈ കഥ ആയിരക്കണക്കിന് ആളുകളുടെ കണ്ണുനിറയ്ക്കുകയും പ്രചോദനമാവുകയും ചെയ്യുകയാണ്.
