പത്തനംതിട്ട: ശബരിമലയിലെ സ്വർണക്കിരീടം കാണാതായതായി സൂചന. തമിഴ്നാട്ടിൽ നിന്നുള്ള ഭക്തർ 2012ൽ സമർപ്പിച്ച 55.72 പവൻ തൂക്കമുള്ള സ്വർണക്കിരീടമാണ് കാണാതായത്. ദേവസ്വം രജിസ്റ്ററിൽ സ്വർണക്കിരീടം രേഖപ്പെടുത്തിയിട്ടുണ്ടെങ്കിലും ആറന്മുളയിലെ സ്ട്രോംഗ് റൂമിൽ സൂക്ഷിച്ചിരിക്കുന്ന കിരീടം മുക്കുപണ്ടമാണെന്നാണ് വിവരം.
ശബരിമലയിലെ സ്വർണക്കൊള്ളയുമായി ബന്ധപ്പെട്ട് ഹൈക്കോടതി നിയോഗിച്ച അമിക്കസ് ക്യൂറിയുടെ നേതൃത്വത്തിൽ കണക്കെടുപ്പ് തുടരുന്നതിനിടെയാണ് സ്വർണക്കിരീടം സംബന്ധിച്ച നിർണായക വിവരം പുറത്തുവരുന്നത്. കിരീടം ആറന്മുളയിലെ സ്ട്രോംഗ് റൂമിൽ എത്തിയിട്ടില്ലെന്നാണ് പ്രാഥമിക പരിശോധനയിലെ കണ്ടെത്തൽ.
ശബരിമലയിൽ ഭക്തർ സമർപ്പിക്കുന്ന വിലപിടിപ്പുള്ള വസ്തുക്കൾ അവിടത്തെ സ്ട്രോംഗ് റൂമിൽ സൂക്ഷിക്കാതെ ആറന്മുളയിലെ സുരക്ഷിതമായ സ്ട്രോംഗ് റൂമിലേക്ക് മാറ്റണമെന്നാണ് നിലവിലുള്ള ചട്ടം. എന്നാൽ 2012ൽ സമർപ്പിച്ച ഈ സ്വർണക്കിരീടം ആറന്മുളയിലെ സ്ട്രോംഗ് റൂമിൽ എത്തിയതിന്റെ രേഖകൾ ലഭ്യമല്ലെന്നാണ് വിവരം.
സ്വർണക്കൊള്ളയുമായി ബന്ധപ്പെട്ട് നടക്കുന്ന പരിശോധനയുടെ ഭാഗമായി സ്വർണാഭരണങ്ങളുടെയും മറ്റ് വിലപിടിപ്പുള്ള വസ്തുക്കളുടെയും കണക്കെടുപ്പ് തുടരുകയാണ്. അമിക്കസ് ക്യൂറിയുടെ അന്തിമ പരിശോധനാ റിപ്പോർട്ട് ഉടൻ ഹൈക്കോടതിയിൽ സമർപ്പിച്ചേക്കും.
