കുട്ടികളിലെ അമിത മൊബൈൽ ഫോൺ ഉപയോഗത്തിനെതിരെ ബോധവൽക്കരണം നടത്താൻ സ്കൂളിൽ സംഘടിപ്പിച്ച നാടകം കണ്ട് ഭയന്നോടി കുട്ടികൾ. ഉത്തരാഖണ്ഡിലെ ഖതിമയിലുള്ള ബിരിയ മോണ്ടെസ്സോറി ഇന്ത്യൻ പബ്ലിക് സ്കൂളിലാണ് ഈ സംഭവം നടന്നത്.
ഫോൺ അമിതമായി ഉപയോഗിച്ചാൽ കണ്ണിന് ഗുരുതര പരിക്കേൽക്കുമെന്നും കാഴ്ച നഷ്ടപ്പെടുമെന്നും കാണിക്കാൻ നടത്തിയ നാടകത്തിലെ രംഗങ്ങൾ കണ്ട് വിദ്യാർത്ഥികൾ ഭയന്ന് കരയുകയായിരുന്നു.
കുട്ടികൾ നിരന്തരം ഫോൺ ഉപയോഗിക്കുന്നുവെന്ന മാതാപിതാക്കളുടെ പരാതിയെ തുടർന്നാണ് പ്രിൻസിപ്പൽ ഹേമ ചുഫാലിന്റെ നേതൃത്വത്തിൽ നാടകം സംഘടിപ്പിച്ചത്. കുട്ടികളെ രോഗികളാക്കിയും, അവരുടെ കണ്ണിന് പരിക്കേറ്റതായും, കാഴ്ച പൂർണ്ണമായും നഷ്ടപ്പെട്ട് കണ്ണുകൾ പുറത്തെടുക്കുന്നതായുമൊക്കെയാണ് നാടകത്തിൽ ചിത്രീകരിച്ചത്.
ഇതൊരു നാടകമാണെന്ന് തിരിച്ചറിയാൻ സാധിക്കാതെ, വലിയൊരു അപകടം സംഭവിച്ചതാണെന്ന് കരുതി സ്കൂളിലെ എട്ടാം ക്ലാസ് വരെയുള്ള കുട്ടികൾ ഭയന്ന് വിറച്ചു. തുടക്കത്തിൽ ഈ ആശയം കുട്ടികളിൽ നെഗറ്റീവ് സ്വാധീനം ഉണ്ടാക്കുമോ എന്ന് ആശങ്കപ്പെട്ടിരുന്നുവെന്ന് പ്രിൻസിപ്പൽ ഹേമ പറഞ്ഞു.
എന്നാൽ വീട്ടിലെത്തിയ കുട്ടികൾ ഇനി ഫോൺ ഉപയോഗിക്കില്ലെന്ന് മാതാപിതാക്കളോട് പറഞ്ഞതോടെ പല രക്ഷിതാക്കളും ഇതിനെ അനുകൂലിച്ചു. പ്രദേശത്ത് മറ്റ് വിനോദ കേന്ദ്രങ്ങളോ ലൈബ്രറികളോ ഇല്ലെന്നതും കാടുപിടിച്ച പ്രദേശമായതിനാൽ കുട്ടികൾ പുറത്തിറങ്ങി കളിക്കുന്നത് കുറവാണെന്നതും ഫോൺ ഉപയോഗം കൂട്ടുന്നുവെന്ന് അവർ വ്യക്തമാക്കി.
അതേസമയം, ബോധവൽക്കരണത്തിനായി ഇത്തരം ഭീതിജനകമായ രീതികൾ ഉപയോഗിച്ചതിനെതിരെ ചൈൽഡ് സൈക്കോളജിസ്റ്റുകൾ രംഗത്തെത്തിയിട്ടുണ്ട്. സംഭവത്തിൽ സ്കൂൾ മാനേജ്മെന്റുമായി സംസാരിക്കാനും ഇത്തരം രീതികൾ ആവർത്തിക്കരുതെന്ന് മുന്നറിയിപ്പ് നൽകാനും അധികൃതർ നിർദ്ദേശം നൽകിയിട്ടുണ്ട്.
