കണ്ണൂർ: ഒരു വർഷത്തെ ഇടവേളയ്ക്കു ശേഷം തുലാം പത്തായ ഇന്നോടെ ഓലച്ചൂട്ടിന്‍റെയും ചെണ്ടയുടെയും താളത്തിൽ മുഖത്തെഴുത്തോടെ ഉത്തരമലബാറിലെ കാവുകളും ക്ഷേത്രങ്ങളും തെയ്യക്കോലങ്ങളുടെ കെട്ടിയാടലുകളോടെ സജീവമാകും. കൊളച്ചേരി ചാത്തന്പള്ളി വിഷകണ്ഠൻ ക്ഷേത്രത്തിൽ ഇന്നലെയും ഇന്നുമായി നടക്കുന്ന പുത്തരിയുത്സവതത്തോടെയാണ് ഉത്തരമലബാറിലെ കാവുകളിലും ക്ഷേത്രങ്ങളിലും തെയ്യക്കാലത്തിന് തുടക്കമാകുക.
ദേവതാ സങ്കൽപങ്ങൾക്കൊപ്പം ജാതീയമായ പകയുടെയും വൈരാഗ്യത്തിന്‍റെയും ഫലമായി മേലാള സമൂഹം ഇല്ലായ്മ ചെയ്ത പിന്നാക്കക്കാരും ദൈവക്കരുവായി മാറുന്നുവെന്നതാണ് തെയ്യത്തിന്‍റെ സവിശേഷത. ജാതീയത കൊടികുത്തിവാണിരുന്ന കാലത്തും ദൈവക്കരുമായ പിന്നാക്കക്കാരന്‍റെ തെയ്യത്തിൽനിന്ന് സവർണരും അനുഗ്രഹം വാങ്ങാനെത്തിയിരുന്നുവെന്നതും ശ്രദ്ധേയമായിരുന്നു.
വൈഷ്ണവ വിശ്വാസവുമായി ബന്ധപ്പെട്ട വിഷ്ണുമൂർത്തി, തീയ്യ സമുദായത്തിൽപ്പെട്ട മാണ്ടപ്പൻ ചേകവരുടെ ജീവിതവും മരണവുമായി ബന്ധപ്പെട്ട കതിവന്നൂർ വീരൻ, വാണിയ സമുദായത്തിന്‍റെ കുല ദേവതയായ മുച്ചിലോട്ട് ഭഗവതി, നാത്തൂൻമാരുടെ അസൂയയിലും കുശുന്പിലും സഹോദരൻമാരാൽ മക്കൾക്കൊപ്പം കൊല്ലപ്പെട്ട കടാങ്കോട്ട് മാക്കവും മക്കളും, ജാതിവ്യവസ്ഥയ്ക്കും അസമത്വങ്ങൾക്കുമെതിരേ ചോദ്യവുമായി ശങ്കരാചര്യരോട് നിങ്കളെ കൊത്തിയാലും ചോരയല്ലേ ചൊവ്വരേ, ഞങ്ങളെ കൊത്തിയാലും ചോരയല്ലേ ചൊവ്വരേ എന്ന ചോദ്യമുയർത്തി എല്ലാവരും മനുഷ്യരാണെന്ന് സമർഥിച്ച പുലയസമുദായാംഗത്തിന്‍റെ പൊട്ടൻ തെയ്യം, കണ്ടനാർ കേളൻ തെയ്യം, തീച്ചാമുണ്ഡി എന്നിവയുൾപ്പെടെ പ്രാദേശികമായി പോലും നിരവധി തെയ്യക്കോലങ്ങൾ ഉത്തരമലബാറിൽ കെട്ടിയാടും.
അന്യമതസ്ഥർ പോലും തെയ്യമായി രൂപപ്പെട്ടിട്ടുണ്ട്. മാപ്പിളച്ചാമുണ്ഡി, മുക്രിത്തെയ്യം, ആലിത്തെയ്യം, ഉമ്മച്ചിത്തെയ്യം മുതലായ ഇവയിൽ ചിലതാണ്. മേയ് മാസത്തിനൊടുവിലോ ജൂൺ ആദ്യവാരമോ നടക്കുന്ന വളപട്ടണം കളരിവാതുക്കൽ ഭഗവതിയുടെ കളിയാട്ടത്തോടെയാണ് ഉത്തരമലബാറിൽ തെയ്യക്കാലങ്ങൾക്ക് സമാപനമാകുക.
