` കഴിഞ്ഞ 20 വർഷമായി വെട്ടിമാറ്റാതെ വളർത്തിയ 5 അടി 3 ഇഞ്ച് (1.603 മീറ്റർ) നീളമുള്ള സ്വാഭാവിക താടി ലോക്കുകളുമായി ഗിന്നസ് വേൾഡ് റിക്കാർഡിൽ ഇടംപിടിച്ച് അമേരിക്കൻ സ്വദേശി. കൻസാസിലെ ബാൾഡ്‌വിൻ സിറ്റിയിൽ നിന്നുള്ള 54 വയസുകാരനായ മാത്യു ഹേ ആണ് ജീവിച്ചിരിക്കുന്നവരിൽ ഏറ്റവും നീളമുള്ള ‘നാച്ചുറൽ താടി ലോക്ക്’ ഉള്ള വ്യക്തി എന്ന നേട്ടം കൈവരിച്ചത്.
റുഡോൾഫ് മാർട്ടിനോയുടെ 3 അടി 6 ഇഞ്ച് എന്ന മുൻ റെക്കോർഡാണ് മാത്യു മറികടന്നത്. മുൻപ് സാധാരണ രീതിയിൽ ചെറിയ താടി മാത്രം വെച്ചിരുന്ന മാത്യു, ഏകദേശം 20 വർഷങ്ങൾക്ക് മുൻപാണ് താടി വളർത്താൻ തുടങ്ങിയത്.
കുട്ടികൾ തമാശയായി താടി പിന്നിക്കെട്ടാൻ ആവശ്യപ്പെട്ടതോടെയാണ് അദ്ദേഹം അത് നീട്ടി വളർത്താൻ തുടങ്ങിയത്. കാലക്രമേണ ഈ താടി ജടപിടിച്ച് സ്വാഭാവികമായ ഒറ്റ ലോക്ക് ആയി മാറുകയായിരുന്നു. പ്രതിവർഷം 3 മുതൽ 4 ഇഞ്ച് വരെയാണ് താടി വളർന്നത്.
താടിക്ക് നല്ല നീളമുള്ളതിനാൽ അരക്കെട്ടിന് ചുറ്റും ബെൽറ്റ് പോലെ ചുറ്റിവെച്ചാണ് അദ്ദേഹം പലപ്പോഴും ദൈനംദിന കാര്യങ്ങൾ ചെയ്യുന്നത്. ജീവിച്ചിരിക്കുന്നവരിൽ ഏറ്റവും നീളമുള്ള സാധാരണ താടിക്കുള്ള ഗിന്നസ് റെക്കോർഡ് കാനഡക്കാരനായ സർവാൻ സിംഗിന്റെ (8 അടി 3 ഇഞ്ച്) പേരിലാണ്. ഇതിൽ നിന്നും വ്യത്യസ്തമായ ‘സ്വാഭാവിക താടി ലോക്ക്’ വിഭാഗത്തിലാണ് മാത്യു റെക്കോർഡ് നേടിയത്.
ഷാംപൂവും കണ്ടീഷണറും ഉപയോഗിക്കുക മാത്രമാണ് മാത്യുവിന്‍റെ ഗ്രൂമിംഗ് രീതി. താടി മുറിക്കാൻ പ്ലാനില്ലെന്നും അദ്ദേഹം തമാശയോടെ പറയുന്നു. ബാഹ്യരൂപം കണ്ടു മനുഷ്യരെ വിലയിരുത്തരുതെന്നും, തന്നിൽ നിന്ന് വ്യത്യസ്തമായി കാണപ്പെടുന്ന എല്ലാവരോടും സഹിഷ്ണുതയും ദയയും കാണിക്കണമെന്നും മാത്യു ഹേ ഓർമിപ്പിക്കുന്നു.
