തിയറ്ററിനുള്ളിലേക്ക് മെറ്റാ സ്മാർട്ട് ഗ്ലാസുകൾ ധരിച്ച് പ്രവേശിക്കാൻ തുനിഞ്ഞ യുവാവിനെ സെക്യൂരിറ്റി ജീവനക്കാർ തടഞ്ഞതിനെത്തുടർന്ന് ഉണ്ടായ തർക്കത്തിന്‍റെ വിഡിയോ സോഷ്യൽ മീഡിയയിൽ വൈറലാകുന്നു. തിയറ്റർ അധികൃതർ കൃത്യമായ നിയന്ത്രണങ്ങൾ ബോർഡിൽ പ്രദർശിപ്പിച്ചിട്ടും ജീവനക്കാരുമായി വാക്കുതർക്കത്തിലേർപ്പെട്ട യുവാവിനെതിരെ സോഷ്യൽ മീഡിയയിൽ വൻ വിമർശനമാണ് ഉയരുന്നത്.
ലക്ഷയ് മേത്ത എന്ന എക്സ് ഉപയോക്താവാണ് തർക്കത്തിന്‍റെ വിഡിയോ പങ്കുവെച്ചത്. രാത്രി 11:50-ന്‍റെ ഷോ കാണാനെത്തിയ യുവാവിനെയാണ് സുരക്ഷാ ജീവനക്കാർ മെറ്റാ ഗ്ലാസ് ധരിച്ചതിന്‍റെ പേരിൽ തടഞ്ഞത്. കണ്ണിന് കാഴ്ചപരിധിയുള്ളതിനാൽ ഡോക്ടർ നിർദ്ദേശിച്ച പവർ ലെൻസുകളാണ് താൻ ഉപയോഗിക്കുന്നതെന്നും, കണ്ണട മാറ്റിയാൽ സിനിമ കാണാൻ കഴിയില്ലെന്നും യുവാവ് വാദിച്ചു. തങ്ങൾ ടിക്കറ്റെടുത്ത ഉപഭോക്താക്കളാണെന്നും ഇതിൽ തങ്ങളുടെ തെറ്റില്ലെന്നും യുവാവ് ചൂണ്ടിക്കാട്ടി.
തിയറ്റർ മാനേജർ തന്‍റെ ഫോണിലെ പോളിസിയും, തിയേറ്ററിന് പുറത്ത് വെച്ചിരിക്കുന്ന ബാനറും കാണിച്ച് മെറ്റാ ഗ്ലാസുകൾക്ക് നിരോധനമുണ്ടെന്ന് വ്യക്തമാക്കി. നിബന്ധനകളിൽ ഇളവ് വരുത്താൻ കഴിയില്ലെന്ന് അറിയിക്കുകയും ചെയ്തു. യുവാവിനൊപ്പമുണ്ടായിരുന്ന സ്ത്രീയും തിയേറ്റർ പോളിസി ചൂണ്ടിക്കാണിച്ച് തർക്കിക്കാതെ കണ്ണട അഴിച്ചുമാറ്റാൻ യുവാവിനോട് ആവശ്യപ്പെടുന്നത് വിഡിയോയിൽ കാണാം.
സിനിമകൾ തിയേറ്ററിനുള്ളിൽ നിന്ന് രഹസ്യമായി ചിത്രീകരിക്കുന്നത് തടയാനാണ് ക്യാമറയും മൈക്രോഫോണുമുള്ള സ്മാർട്ട് ഗ്ലാസുകൾ തിയേറ്ററുകൾ നിരോധിക്കുന്നത്. ഫോൺ ഉപയോഗിച്ചും ആളുകൾ സിനിമ ചിത്രീകരിക്കാറില്ലേ പിന്നെന്തിനാണ് സ്മാർട്ട് ഗ്ലാസിന് മാത്രം നിരോധനം എന്ന് ചോദിച്ചാണ് വിഡിയോ പങ്കുവെച്ചതെങ്കിലും, തിയേറ്റർ നിയമങ്ങൾ ലംഘിച്ച് ജീവനക്കാരുമായി തർക്കിച്ച യുവാവിനെ വിമർശിച്ചാണ് ഭൂരിഭാഗം പേരും കമന്‍റ് ചെയ്യുന്നത്.
ടിക്കറ്റ് ബുക്ക് ചെയ്യുമ്പോൾ തന്നെ നിബന്ധനകൾ വായിച്ചു മനസ്സിലാക്കണമായിരുന്നുവെന്നും, വാക്കുതർക്കത്തിലേർപ്പെട്ട അതേ സ്മാർട്ട് ഗ്ലാസ് വെച്ച് തന്നെയാണ് യുവാവ് ഈ സംഭവം വിഡിയോ പകർത്തിയതെന്നും ആളുകൾ കളിയാക്കി കുറിച്ചു.
