ഇന്ത്യയിൽ ദീപാവലിക്ക് ഒരു ആഴ്ച നീളുന്ന അവധി നൽകണമെന്ന് ആവശ്യപ്പെടുന്ന സോഷ്യൽ മീഡിയ കുറിപ്പ് വൈറലാകുന്നു. നിലവിലുള്ള രണ്ടു ദിവസത്തെ അവധി, ദൂരസ്ഥലങ്ങളിൽ ജോലി ചെയ്യുന്നവർക്ക് നാട്ടിലെത്തി കുടുംബത്തോടൊപ്പം ദീപാവലി ആഘോഷിക്കാൻ തികയില്ലെന്ന് വ്യക്തമാക്കിക്കൊണ്ട് ഒരു എക്സ് ഉപയോക്താവ് പങ്കുവെച്ച പോസ്റ്റാണ് വലിയ ചർച്ചകൾക്ക് വഴിവെച്ചിരിക്കുന്നത്.
പാശ്ചാത്യ രാജ്യങ്ങളിൽ ക്രിസ്മസ്-ന്യൂ ഇയർ സമയത്ത് ഒരാഴ്ചയോളം നീളുന്ന അവധി നൽകുന്ന മാതൃകയിൽ ഇന്ത്യയിലും ദീപാവലിക്ക് ഒരാഴ്ചത്തെ അവധി നൽകണമെന്ന് പോസ്റ്റിൽ പറയുന്നു. സ്വന്തം നാട്ടിൽ നിന്നും 1000 മുതൽ 2000 കിലോമീറ്റർ വരെ അകലെ ജോലി ചെയ്യുന്ന തൊഴിലാളികൾക്ക് നാട്ടിലെത്താൻ തീവണ്ടിയിൽ 30 മുതൽ 40 മണിക്കൂർ വരെ യാത്ര ചെയ്യേണ്ടിവരുന്നു. എന്നാൽ ഓഫീസുകളിൽ നിന്ന് രണ്ടു ദിവസത്തിൽ കൂടുതൽ അവധി ലഭിക്കാറില്ല. വിമാന ടിക്കറ്റ് നിരക്കാകട്ടെ 20,000 മുതൽ 30,000 രൂപ വരെ ഉയരുന്നതിനാൽ സാധാരണക്കാർക്ക് താങ്ങാനാവില്ലെന്നും പോസ്റ്റിൽ ചൂണ്ടിക്കാണിക്കുന്നു.
തൊഴിൽ സമ്മർദ്ദവും യാത്രയിലെ ബുദ്ധിമുട്ടുകളും കാരണം മാതാപിതാക്കൾക്കും കുടുംബത്തിനുമൊപ്പം ദീപാവലി ആഘോഷിക്കാൻ കഴിയാത്ത അവസ്ഥയാണുള്ളത്. ഇത്തരം തൊഴിൽ സംസ്‌കാരം കാരണം സന്തോഷ സൂചികയിൽ ഇന്ത്യ പിന്നിലായി പോകുന്നതിൽ അത്ഭുതപ്പെടാനില്ലെന്നും കുറിപ്പിൽ വിമർശിക്കുന്നു. ഈ അഭിപ്രായത്തെ പിന്തുണച്ച് നിരവധി ആളുകളാണ് രംഗത്തെത്തിയിരിക്കുന്നത്. പാശ്ചാത്യ രാജ്യങ്ങളിൽ മാത്രമല്ല, ഈജിപ്ത് പോലുള്ള രാജ്യങ്ങളിലും ഈദ് ആഘോഷങ്ങൾക്ക് ഒരാഴ്ചത്തെ അവധി നൽകാറുണ്ടെന്ന് ഉപയോക്താക്കൾ അഭിപ്രായപ്പെടുന്നു. തൊഴിൽ-ജീവിത സന്തുലിതാവസ്ഥ ഉറപ്പാക്കാൻ ഇത്തരം നീളമുള്ള ഉത്സവ അവധികൾ അത്യാവശ്യമാണെന്നാണ് സോഷ്യൽ മീഡിയയിലെ പൊതുവികാരം.
