ദീപാവലി രാവിൽ ആയിരക്കണക്കിന് അടി ഉയരത്തിൽ നിന്ന് നോക്കിയാൽ ചെന്നൈ നഗരം ഒരു നക്ഷത്രസമൂഹത്തെപ്പോലെ തിളങ്ങുമെന്ന് തെളിയിക്കുന്ന മനോഹരമായ ദൃശ്യങ്ങൾ സമൂഹ മാധ്യമങ്ങളിൽ തരംഗമാകുന്നു. പൈലറ്റായ പ്രദീപ് കൃഷ്ണൻ തന്‍റെ വിമാനത്തിൽ നിന്ന് പകർത്തിയ ദീപാവലി ആഘോഷങ്ങളുടെ ആകാശക്കാഴ്ചയാണ് ഇപ്പോൾ വൈറലായിരിക്കുന്നത്. ഇൻസ്റ്റാഗ്രാമിൽ പങ്കുവെച്ച ഈ വീഡിയോ ഇതിനോടകം ഏഴ് ദശലക്ഷത്തിലധികം ആളുകൾ കണ്ടുകഴിഞ്ഞു.
ഇരുണ്ട രാത്രിയിൽ ചെന്നൈ നഗരത്തിലെ വീടുകളും തെരുവുകളും ദീപാലങ്കാരങ്ങളാൽ പ്രകാശപൂരിതമായിരിക്കുന്ന മനോഹരമായ കാഴ്ചയാണ് വീഡിയോയിലുള്ളത്. താഴെ നിന്ന് കാണുന്നതിനേക്കാൾ വലിയൊരു ദൃശ്യവിരുന്നാണ് ആകാശത്തുനിന്നുള്ള ഈ കാഴ്ച നൽകുന്നത്. ദീപാവലി ആശംസകൾ നേർന്നുകൊണ്ടാണ് പൈലറ്റ് ഈ വീഡിയോ പങ്കുവെച്ചിരിക്കുന്നത്. അതേസമയം, വീഡിയോയുടെ അവസാന ഫ്രെയിം കോക്ക്പിറ്റിന് പുറത്തുനിന്ന് 8x സൂം ഉപയോഗിച്ച് നിലത്തുനിന്നും എടുത്തതാണെന്നും അദ്ദേഹം വ്യക്തത വരുത്തിയിട്ടുണ്ട്.
ഭൂമിയിലെ ദീപാവലി ആഘോഷങ്ങളുടെ തിളക്കം ആകാശത്തുനിന്നൂം എത്രത്തോളം മനോഹരമാണെന്ന് ഓർമ്മിപ്പിക്കുന്നതാണ് ഈ ദൃശ്യങ്ങൾ. വിമാനയാത്രയിൽ നിന്നുള്ള ഈ അപൂർവ്വ കാഴ്ചയ്ക്ക് വലിയ സ്വീകാര്യതയാണ് സമൂഹ മാധ്യമങ്ങളിൽ ലഭിക്കുന്നത്.
