കൊച്ചി: കേരള പൊലിസ് സൈബര്‍ ഡിവിഷന്‍റെ നേതൃത്വത്തില്‍ സംസ്ഥാനവ്യാപകമായി നടത്തിയ ‘ഓപ്പറേഷന്‍ സൈഹണ്ട് 5.0’ പരിശോധനയില്‍ സൈബര്‍ സാമ്പത്തിക കുറ്റകൃത്യങ്ങളുമായി ബന്ധപ്പെട്ട് 50 പേര്‍ അറസ്റ്റിലായി. സൈബര്‍ സാമ്പത്തിക തട്ടിപ്പുകള്‍ തടയുന്നതിനും സൈബര്‍ സംഘടിത കുറ്റവാളികളുടെ സാമ്പത്തിക സ്രോതസുകളും മ്യൂള്‍ അക്കൗണ്ടുകളും കണ്ടെത്തി തടയുന്നതിനുമായാണ് പരിശോധന നടത്തിയത്.
നാഷണല്‍ സൈബര്‍ ക്രൈം റിപ്പോര്‍ട്ടിംഗ് പോര്‍ട്ടലിലെ പരാതികളും സാമ്പത്തിക ഇടപാടുകളുടെ വിവരങ്ങളും വിശകലനം ചെയ്ത് തയാറാക്കിയ സംഘടിത കുറ്റവാളികളുടെ വിവരശേഖരണത്തെ അടിസ്ഥാനമാക്കിയാണ് പരിശോധനകളും തുടര്‍നടപടികളും ഏകോപിപ്പിച്ചത്.
സംസ്ഥാനത്തുടനീളം 983 റെയ്ഡുകള്‍ നടത്തി. 225 പേരെയാണ് ചോദ്യം ചെയ്തത്. 258 പേര്‍ക്ക് ബിഎന്‍എസ്എസ് സെക്ഷന്‍ 35 പ്രകാരം നോട്ടീസ് നല്‍കി. വിവിധ പൊലിസ് സ്‌റ്റേഷനുകളിലായി 367 കേസുകള്‍ രജിസ്റ്റര്‍ ചെയ്യുകയും 178 ഉപകരണങ്ങള്‍ പിടിച്ചെടുക്കുകയും ചെയ്തു.
ചെക്ക്, എടിഎം മുഖേന തട്ടിപ്പുപണം പിന്‍വലിക്കുന്ന 478 പേരെയും 661 മ്യൂള്‍ അക്കൗണ്ടുകളുമായി ബന്ധപ്പെട്ടവരെയും തിരിച്ചറിഞ്ഞിട്ടുണ്ട്. തട്ടിപ്പില്‍ നേരിട്ട് ഏര്‍പ്പെടുന്നവര്‍ക്കൊപ്പം സാമ്പത്തിക ഇടപാടുകള്‍ക്ക് സൗകര്യമൊരുക്കുന്നവരെയും അക്കൗണ്ടുകള്‍ കൈമാറുന്നവരെയും കണ്ടെത്തി നിയമനടപടികള്‍ സ്വീകരിക്കുന്നതിലൂടെ സൈബര്‍ കുറ്റകൃത്യങ്ങളുടെ വേരുകള്‍ തന്നെ ഇല്ലാതാക്കുകയാണ് ഈ ദൗത്യത്തിന്റെ ലക്ഷ്യം. ഇത്തരം സംഘടിത കുറ്റകൃത്യങ്ങള്‍ക്കെതിരായ വിവരാധിഷ്ഠിതവും ഏകോപിതവുമായ പോലീസ് നടപടി തുടരും.
സംശയകരമായ ഇടപാടുകള്‍ ശ്രദ്ധയില്‍പ്പെട്ടാല്‍ ഉടന്‍ 1930 എന്ന ഹെല്‍പ് ലൈന്‍ നമ്പറില്‍ ബന്ധപ്പെടുകയോ Cyber Crime Portal എന്ന വെബ്‌സൈറ്റ് വഴിയോ പരാതി നല്‍കാം. കൂടാതെ അടുത്തുള്ള പൊലിസ് സ്‌റ്റേഷനെയോ സൈബര്‍ പൊലിസ് സ്‌റ്റേഷനെയോ ബന്ധപ്പെടാം.
സ്വന്തം ലേഖിക
