പഴയങ്ങാടി: വെങ്ങര റെയിൽവേ മേൽപാലത്തിന്‍റെ റെയിൽവെ ട്രാക്കിന് മുകളിൽ നടത്തേണ്ട പ്രവൃത്തിയുടെ അലൈൻമെൻറ് ഡിസൈൻ വേഗത്തിൽ അംഗീകാരം ലഭിക്കുന്നതിന് നടപടി സ്വീകരിക്കണമെന്ന് എം. വിജിൻ എംഎൽഎ കെആർഎഫ്ബി എക്സിക്യൂട്ടീവ് എൻജിനിയർക്ക് നിർദേശം നൽകി.
കഴിഞ്ഞ എൽഡിഎഫ് സർക്കാർ കിഫ്ബി പദ്ധതിയിൽ ഉൾപ്പെടുത്തി വെങ്ങര റെയിൽവേ മേൽപാലം നിർമിക്കുന്നതിന് 21 കോടി രൂപയാണ് അനുവദിച്ചത്.
290.16 മീറ്റർ നീളത്തിലും 10.06 മീറ്റർ വീതിയിലും നിർമിക്കുന്ന പാലത്തിന്‍റെ പ്രവൃത്തി 2021 ഫെബ്രുവരിയിൽ ആരംഭിച്ചു. 22.32 മീറ്റർ വലുപ്പത്തിൽ 13 സ്പാനുകളും നടപാതയും പാലത്തിലേക്ക് പടവുകളും നിർമിക്കുന്ന പ്രവൃത്തികൾ ഉൾപ്പടെ നേരത്തെ പൂർത്തീകരിച്ചതാണ്.
റെയിൽവേ ലൈനിന് മുകളിൽ വരുന്നഭാഗം മാത്രമാണ് പൂർത്തീകരിക്കാനുള്ളത്. പ്രസ്തുത പ്രവൃത്തി റെയിൽവേയുടെ മേൽനോട്ടത്തിലാണ് നടത്തേണ്ടത്. റെയിൽവേ ലൈനിന് മുകളിൽ നടത്തേണ്ട പ്രവൃത്തിയുടെ ഡിസൈൻ കെആർഎഫ്ബി മുഖേന നടത്താൻ റെയിൽവേ നൽകിയിരുന്നു.
ഇതുമായി മുന്നോട്ടുപോകുന്ന ഘട്ടത്തിലാണ് ദേശീയതലത്തിൽ റെയിൽവേ മേൽപാലങ്ങളിൽ റെയിൽവേ ലൈനിന്‍റെ മുകൾഭാഗത്ത് വരുന്ന ഡിസൈൻ സ്ട്രക്ച്ചറിൽ മാറ്റംവരുത്താൻ തീരുമാനിച്ചത്. ഇതിന്‍റെ ഭാഗമായി നേരത്തെ അംഗീകാരത്തിനായി സമർപ്പിച്ച ഡിസൈൻ റെയിൽവേ തിരിച്ചുവാങ്ങുകയായിരുന്നു.
ഇപ്പോൾ ഡ്രോയിംഗിന് വീണ്ടും പുതുക്കി ദേശീയ മാനദണ്ഡപ്രകാരമുള്ള സ്ട്രക്ചറൽ ഡിസൈൻ ഡ്രോയിംഗ് തയാറാക്കി അംഗീകാരത്തിന് സമർപ്പിക്കാനാണ് റെയിൽവേ അധികൃതർ ഇപ്പോൾ നിർദേശിച്ചിരിക്കുന്നത്.
മേൽപാലം നിർമാണം നീണ്ടുപോകുന്നതിൽ ജനങ്ങൾ കടുത്ത പ്രതിഷേധത്തിലാണ്. ഏഴിമല നേവൽ അക്കാദമി, പഴയങ്ങാടി റെയിൽവേ സ്റ്റേഷൻ തുടങ്ങിയ പ്രധാന കേന്ദ്രങ്ങളിൽ ഇതുവഴിയാണ് പോകേണ്ടത്. നിലവിലുള്ള വെങ്ങര റെയിൽവേ ഗേയിറ്റ് അടച്ചാൽ വാഹനങ്ങളുടെ നീണ്ടനിരയാണ്. ഇത് പരിഹരിക്കുന്നതിന് അടിയന്തിരമായി മേൽപാലത്തിന്‍റെ നിർമാണം പൂർത്തീകരിക്കേണ്ടതുണ്ട്.
