ഇരിട്ടി: യാത്രക്കാരെ ലക്ഷ്യസ്ഥാനത്ത് എത്തിക്കുന്ന തിരക്കിനിടയിലും പക്ഷികൾക്ക് അന്നം നൽകാൻ സമയം കണ്ടെത്തുകയാണ് പയഞ്ചേരിയിലെ ഓട്ടോഡ്രൈവർ ടി.ആർ. സുരേഷ്. പ്രാവുകൾക്കും കിളികൾക്കും ദിവസവും ഭക്ഷണം നൽകി അവയുടെ പ്രിയപ്പെട്ട കൂട്ടുകാരനായി മാറിയിരിക്കുകയാണ് സഹാനി ആശുപത്രിക്കുമുന്നിലെ ഓട്ടോഡ്രൈവർ.
രാവിലെയും ഉച്ചയ്ക്കും വൈകുന്നേരവും സുരേഷിനെ തേടി പ്രാവുകളും കിളികളുമെത്തും. വെറുംകൈയോടെ മടക്കിവിടാതെ നിലക്കടലയും അരിയും നൽകി അവയെ സ്വീകരിക്കും. ഇതിനായി നിലക്കടലയും അരിയും എപ്പോഴും ഓട്ടോറിക്ഷയിൽ കരുതിയിട്ടുമുണ്ട്.
സുരേഷിന്‍റെ കൈകളിലിരുന്നുപോലും ധാന്യങ്ങൾ കൊത്തിത്തിന്നുന്ന പ്രാവുകളുടെ കാഴ്ച വഴിയാത്രക്കാർക്കും കൗതുകമാണ്. മൂന്നുവർഷം മുമ്പാണ് ഈ അപൂർവ സൗഹൃദത്തിന് തുടക്കമായത്. പിന്നീട് സുരേഷിന്‍റെ ദിനചര്യയുടെ ഭാഗമായി പക്ഷികൾക്ക് ഭക്ഷണം നൽകുന്നതും മാറി. ജോലിത്തിരക്കിനിടെ ചില ദിവസങ്ങളിൽ ഭക്ഷണം നൽകാൻ വൈകിയാൽ പക്ഷികൾ പതിവുസ്ഥലത്തെത്തി ശബ്ദമുണ്ടാക്കി സുരേഷിനെ അന്വേഷിക്കും.
കിട്ടുന്ന ചെറിയ ഇടവേളകളിൽപോലും അവയ്ക്കരികിലെത്തി ഭക്ഷണം നൽകാൻ സുരേഷ് മടിക്കാറില്ല. ഇരിട്ടി പയഞ്ചേരി വായനശാല സ്വദേശിയായ സുരേഷിന് പക്ഷികൾ വെറും കാഴ്ചവസ്തുക്കളല്ല, ജീവിതത്തിലെ പ്രിയപ്പെട്ട കൂട്ടുകാരാണ്.
മനുഷ്യരുടെ തിരക്കുകൾക്കിടയിലും പ്രകൃതിയോടും സഹജീവികളോടും അൽപം കരുതൽ കാണിച്ചാൽ എത്ര മനോഹരമായ ബന്ധങ്ങൾ വളർത്തിയെടുക്കാമെന്നതിന്‍റെ നേർസാക്ഷ്യമാണ് സുരേഷും പക്ഷികളും തമ്മിലുള്ള ഈ സൗഹൃദം.
ബിജു പാരിക്കാപ്പള്ളി
