കണ്ണപുരം: എഴുത്തുകാരനും കണ്ണൂര് സര്വകലാശാല സ്റ്റുഡന്റ് സര്വീസസ് മുന് ഡീനുമായ വി.എസ്. അനില്കുമാറിന്റെ കണ്ണപുരത്തെ വീടിനുമുന്നില് അജ്ഞാതര് റീത്ത് വച്ചു. അന്തരിച്ച പ്രഫസർ എം.എന്. വിജയന്റെ മകനാണ് അനിൽ കുമാർ.
ഇന്ന് പുലർച്ചെ അഞ്ചോടെ മകനെ ഫുട്ബോള് കോച്ചിംഗിന് വിടാൻ വാതിൽ തുറന്നപ്പോഴാണ് ഗേറ്റിനുസമീപം റീത്ത് വച്ചിരിക്കുന്നത് അനില് കുമാറിന്റെ ശ്രദ്ധയില്പ്പെട്ടത്. ഉടന് തന്നെ അദ്ദേഹം പോലീസിനെ വിവരമറിയിച്ചു. സംഭവത്തെ തുടര്ന്ന് കണ്ണപുരം പോലീസ് അന്വേഷണം തുടങ്ങിയിട്ടുണ്ട്.
പയ്യന്നൂരിലെ സിപിഎം വിമതന് വി. കുഞ്ഞികൃഷ്ണന് രചിച്ച “നേതൃത്വത്തെ അണികള് തിരുത്തണം’ എന്ന പുസ്തകം ഏറ്റുവാങ്ങിയത് വി.എസ്. അനില്കുമാറായിരുന്നു.
ഈ പുസ്തക പ്രകാശന ചടങ്ങില് പങ്കെടുത്തതിനപ്പുറം സിപിഎം നേതൃത്വത്തിന്റെ നിലപാടുകളെ സോഷ്യല് മീഡിയയിലൂടെയും മറ്റും അദ്ദേഹം നിരന്തരം വിമര്ശിക്കാറുണ്ടായിരുന്നു. ഭീഷണികളെ ഭയക്കുന്നില്ലെന്നും ആശയ സംഘർഷം ജീവിതശൈലിയാണും റീത്ത് വച്ചത് ഭീരുക്കളുടെ നടപടിയാണെന്നും അനിൽകുമാർ പ്രതികരിച്ചു.
