തിരുവനന്തപുരം: ബാലാവകാശ കമ്മീഷനെതിരേ വിമർശനവുമായി പ്രതിപക്ഷ നേതാവ് രമേശ് ചെന്നിത്തല രംഗത്ത്. വനിതാ മതിലിൽ കുട്ടികൾ പങ്കെടുക്കുന്നത് വിലക്കിയ ഹൈക്കോടതി വിധിക്കെതിരേ ബാലാവകാശ കമ്മീഷൻ പറഞ്ഞത് രാഷ്ട്രീയമാണ്. കമ്മീഷൻ അധ്യക്ഷനെതിരേ നിയമ നടപടി സ്വീകരിക്കണമെന്നും പ്രതിപക്ഷ നേതാവ് ആവശ്യപ്പെട്ടു. ഇടതുപക്ഷം എന്ന പേര് പറയാൻ പോലും യോഗ്യതയില്ലാത്ത മുന്നണിയാണ് ഇന്ന് കേരളം ഭരിക്കുന്നത്. വരുന്ന ലോക്സഭാ തെരഞ്ഞെടുപ്പിൽ ദയനീയ തോൽവിയുണ്ടാകുമെന്ന് ഉറപ്പായതോടെയാണ് എൽഡിഎഫ് വർഗീയ കക്ഷികളെ ഒപ്പം ചേർക്കാൻ തീരുമാനിച്ചതെന്നും അദ്ദേഹം ആരോപിച്ചു. വനിതാ മതിലിന്റെ പേരിൽ കുടുംബശ്രീകളെ സർക്കാർ ഭീഷണിപ്പെടുത്തുകയാണ്. ഇതിനെ രാഷ്ട്രീയമായും നിയമപരമായും നേരിടുമെന്നും രമേശ് ചെന്നിത്തല കൂട്ടിച്ചേർത്തു.
Read MoreCategory: TVM
ജയന്റെ ജ്യോതി തെളിഞ്ഞത് കൈവിലങ്ങിനായി; ഋഷിരാജ് സിംഗിനെ അയ്യപ്പജ്യോതിയിൽ “പങ്കെടുപ്പിച്ചത്’ ബിജെപി പ്രവർത്തകൻ
തിരുവനന്തപുരം: എക്സൈസ് കമ്മീഷണർ ഋഷിരാജ് സിംഗ് അയ്യപ്പജ്യോതിയിൽ പങ്കെടുത്തുവെന്നു വ്യാജപ്രചാരണം നടത്തിയ സംഭവത്തിൽ ബിജെപി പ്രദേശിക നേതാവിനെതിരെ പോലീസ് കേസെടുത്തു. തിരുവല്ല സ്വദേശി ജെ. ജയനെതിരെയാണ് തിരുവല്ലയിൽ കേസ് രജിസ്റ്റർ ചെയ്തത്. തനിക്കെതിരേ നടക്കുന്ന വ്യാജപ്രചാരണത്തിനെതിരേ ഋഷിരാജ് സിംഗ് പരാതി നൽകിയിരുന്നു. അയ്യപ്പജ്യോതിയിൽ താൻ പങ്കെടുത്തിട്ടില്ലെന്നും വ്യാജപ്രചാരണം തടയണമെന്നും ആവശ്യപ്പെട്ട് ഡിജിപി ലോക്നാഥ് ബെഹ്റയ്ക്കാണ് പരാതി നൽകിയത്. സോഷ്യൽ മീഡിയയിൽ സംഘപരിവാർ അക്കൗണ്ടുകൾ വഴിയായിരുന്നു വ്യാജപ്രചാരണം നടത്തിയത്. തുടർന്നാണ് സൈബർ പോലീസ് കേസെടുത്ത് അന്വേഷണം ആരംഭിച്ചത്. തൃശൂർ കൊരട്ടി സ്വദേശിയും ഇന്ത്യൻ നേവിയിലെ റിട്ടയേർഡ് ഉദ്യോഗസ്ഥനുമായ മോഹൻദാസിന്റെ ചിത്രം ഉപയോഗിച്ചാണ് ഋഷിരാജ് സിംഗ് എന്ന രീതിയിൽ വ്യാജപ്രചാരണം നടത്തിയതെന്നു സൈബർ പോലീസ് അന്വേഷണത്തിൽ കണ്ടെത്തിയിരുന്നു.
Read Moreവനിതാ മതിൽ; ഹൈക്കോടതി ഉത്തരവ് കുട്ടികളുടെ അവകാശങ്ങൾക്ക് മേലുള്ള കടന്നുകയറ്റമെന്ന് ബാലാവകാശ കമ്മീഷൻ
തിരുവനന്തപുരം: വനിതാ മതിലിൽ കുട്ടികൾ പങ്കെടുക്കരുതെന്ന ഹൈക്കോടതി ഉത്തരവിനെതിരേ രൂക്ഷ വിമർശനവുമായി ബാലാവകാശ കമ്മീഷൻ രംഗത്ത്. ഹൈക്കോടതി ഉത്തരവ് കുട്ടികളുടെ അവകാശങ്ങൾക്ക് മേലുള്ള കടന്നു കയറ്റമാണെന്ന് കമ്മീഷൻ വിമർശിച്ചു. കുട്ടികൾക്കും അവരുടെ അഭിപ്രായം രേഖപ്പെടുത്താൻ സ്വാതന്ത്ര്യമുണ്ട്. അത് മൗലികാവകാശങ്ങളുടെ പരിധിയിൽ വരുന്ന സംഭവം നന്നെയാണ്. കുട്ടികൾ വനിതാ മതിലിന്റെ ഭാഗമാകരുതെന്ന ഉത്തരവ് ശരിയായില്ലെന്നും പുനപരിശോധിക്കപ്പെടേണ്ടതാണെന്നും ബാലാവകാശ കമ്മീഷൻ അഭിപ്രായപ്പെട്ടു.
Read Moreമന്ത്രി ജലീലിനെതിരേ വിജിലൻസ് അന്വേഷണമുണ്ടോ; ഇല്ലെങ്കിൽ ഹൈക്കോടതിയിലേക്കെന്ന് ഫിറോസ്
തിരുവനന്തപുരം: ബന്ധുനിയമന വിവാദത്തിൽ മന്ത്രി കെ.ടി.ജലീലിനെതിരേ വിജിലൻസ് അന്വേഷണത്തിന് സർക്കാർ തയാറാകുന്നില്ലെങ്കിൽ ഹൈക്കോടതിയെ സമീപിക്കുമെന്ന് യൂത്ത് ലീഗ് സംസ്ഥാന ജനറൽ സെക്രട്ടറി പി.കെ.ഫിറോസ്. തിരുവനന്തപുരത്ത് മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. അന്വേഷണം നടത്തുമോ എന്ന് ആരാഞ്ഞ് വിജിലൻസ് ഡയറക്ടർക്ക് വിവരാവകാശ നിയമപ്രകാരം അപേക്ഷ നൽകിയിട്ടുണ്ട്. ഇതിന് ലഭിക്കുന്ന മറുപടി അനുസരിച്ച് തുടർ നടപടികൾ സ്വീകരിക്കും. ബന്ധുനിയമന വിവാദത്തിൽ അഴിമതി വ്യക്തമാണെന്നും അന്വേഷണം പ്രഖ്യാപിച്ചാൽ കുടുങ്ങുമെന്ന് ഉറപ്പുള്ളതുകൊണ്ടാണ് മുഖ്യമന്ത്രിയും മന്ത്രി ജലീലും ഒളിച്ചുകളിക്കുന്നതെന്നും അദ്ദേഹം കുറ്റപ്പെടുത്തി. മുൻ ഡിജിപി ടി.പി.സെൻകുമാറിനെതിരേ മതസ്പർധ വളർത്തിയെന്ന കേസിൽ എത്രയും വേഗം കുറ്റപത്രം സമർപ്പിക്കാൻ സർക്കാർ തയാറാകണം. സെൻകുമാറിന്റെ ആർഎസ്എസ് ബന്ധം വ്യക്തമായിരിക്കുകയാണെന്നും എന്നിട്ടും പിണറായി വിജയൻ സർക്കാർ അദ്ദേഹത്തെ കേസുകളിൽ നിന്നും ഒഴിവാക്കാൻ ശ്രമിക്കുകയാണെന്നും ഫിറോസ് ആരോപിച്ചു.
Read Moreശബരിമല ആക്ടിവിസം കാണിക്കാനുള്ള ഇടമല്ല; യുവതികളെ കയറ്റാത്തത് സർക്കാരിന് താത്പര്യമില്ലാത്തതുകൊണ്ടെന്ന് ദേവസ്വം മന്ത്രി
ശബരിമലയിൽ എത്തുന്ന ആക്ടിവിസ്റ്റുകൾക്കെതിരേ ദേവസ്വം മന്ത്രി കടകംപള്ളി സുരേന്ദ്രൻ വീണ്ടും രംഗത്ത്. ആക്ടിവിസ്റ്റുകൾക്ക് പ്രവർത്തന മികവ് കാണിക്കാനുളള സ്ഥലമല്ല ശബരിമലയെന്ന് അദ്ദേഹം ആവർത്തിച്ചു. ശബരിമല അവലോകന യോഗത്തിന് ശേഷം വാർത്താ സമ്മേളനത്തിൽ സംസാരിക്കുകയായിരുന്നു അദ്ദേഹം. ശബരിമലയിൽ യുവതികളെ കയറ്റാത്തത് സർക്കാരിന് താത്പര്യമില്ലാത്തതുകൊണ്ടു തന്നെയാണെന്നും അല്ലാതെ ചട്ടന്പിമാരുട ശരണംവിളി കേട്ടിട്ടല്ലെന്നും മന്ത്രി പറഞ്ഞു. ബിജെപിയുടെയും സംഘപരിവാർ സംഘടനകളുടെ വ്യാജ പ്രചരണങ്ങളിലൂടെ ശബരിമലയിൽ എത്തുന്ന ഭക്തരുടെ എണ്ണത്തിൽ കുറവുണ്ടായിട്ടുണ്ട്. മനിതി സംഘം മലകയറാൻ എത്തിയപ്പോഴുണ്ടായ പോലീസ് നടപടി പരിശോധിക്കപ്പെടേണ്ടതാണെന്നും അദ്ദേഹം പറഞ്ഞു. ഹൈക്കോടതി നിരീക്ഷക സമിതിക്കെതിരേ മന്ത്രി വീണ്ടും വിമർശനം ഉന്നയിച്ചു. അടിസ്ഥാന സൗകര്യങ്ങൾ മാത്രം നിരീക്ഷക സമിതി പരിശോധിച്ചാൽ പോരെന്നും സംഘർഷ സാഹചര്യങ്ങളിൽ ഉപദേശം നൽകാൻ തയാറാകണമെന്നും ദേവസ്വം മന്ത്രി ആവശ്യപ്പെട്ടു.
Read Moreഓട്ടോറിക്ഷയിൽ നിന്നും ബാറ്ററി മോഷണം നടത്തുന്ന യുവാവ് അറസ്റ്റിൽ; പ്രതി മോഷണത്തിന് എത്തിയിരുന്നത് പ്രായപൂർത്തിയാകാത്ത കുട്ടികളുമായെന്ന് പോലീസ്
തിരുവനന്തപുരം: ഓട്ടോറിക്ഷയിൽ നിന്നും ബാറ്ററി മോഷ്ടിച്ച യുവാവിനെ പൂജപ്പുര പോലീസ് അറസ്റ്റ് ചെയ്തു. ചെങ്കൽചൂള കോളനിയിൽ താമസിക്കുന്ന രാജീവ് (23) ആണ് അറസ്റ്റിലായത്. തമലം ജംഗ്ഷന് സമീപം പാർക്ക് ചെയ്തിരുന്ന ഓട്ടോറിക്ഷയിൽ നിന്നും ബാറ്ററി മോഷ്ടിച്ച കേസിലാണ് അറസ്റ്റ്. പ്രായപൂർത്തിയാകാത്ത കുട്ടിയെയും കൂട്ടി ബൈക്കിലെത്തിയാണ് ഇയാൾ മോഷണം നടത്തിയതെന്ന് പോലീസ് പറഞ്ഞു. പൂജപ്പുര എസ്ഐ. ഗോപി ചന്ദ്രൻ, എഎസ്ഐ. അനിൽകുമാർ, സിപിഒ. വിഷ്ണു ചന്ദ്രൻ എന്നിവരുടെ നേതൃത്വത്തിലുള്ള പോലീസ് സംഘമാണ് പ്രതിയെ അറസ്റ്റ് ചെയ്തത്.
Read Moreനാടകസമിതിയുടെ മിനി ബസും കാറുമായി കൂട്ടിയിടിച്ച് അപകടം ; മൂന്ന് പേർക്ക് പരിക്ക്; സാരമായി പരിക്കേറ്റവരെ തിരുവനന്തപുരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു
വെഞ്ഞാറമൂട്: കാക്കാരശി നാടക സമിതിയുടെ മിനി ബസ് കാറുമായി കൂട്ടിയിടിച്ച് റോഡിലേയ്ക്ക് മറിഞ്ഞു.മൂന്ന് നാടകപ്രവർത്തകർക്ക് പരിക്ക്. വിതുര സ്വദേശി അഖിൽ (19), മിനാങ്കൽ സ്വദേശി അനന്തു (18) ‘ ഓച്ചിറ സ്വദേശി സന്തോഷ് (29) എന്നിവർക്കാണ് പരിക്കു പറ്റിയത്. ഇന്ന് പുലർച്ചെ മൂന്നിന് സംസ്ഥാന പാതയിൽ പിരപ്പൻകോട് കൊപ്പം പഞ്ചായത്ത് കിണർ ജംഗ്ഷന് സമീപം ആയിരുന്നു അപകടം. ചക്കുളത്ത് കാവിൽ സ്റ്റേജ് പ്രോഗ്രാം കഴിഞ്ഞു വരുകയായിരുന്ന നെടുമങ്ങാട് നവകേരളാ നാടക സമിതിയുടെ വാഹനമാണ് അപകടത്തിൽപ്പെട്ടത്. വെഞ്ഞാറമൂട് ഭാഗത്ത് നിന്നും വെമ്പായം ഭാഗത്തേയ്ക്ക് പോകുകയായിരുന്ന മിനി ബസിൽ എതിരെ വരുകയായിരുന്ന കാർ നിയന്ത്രണം വിട്ട് വന്നിടിക്കുകയായിരുന്നു. ഇടിയുടെ ആഘാതത്തിൽ മിനി ബസ് റോഡിലേയ്ക്ക് മറിയുകയായിരുന്നു. ശബ്ദം കേട്ട് നാട്ടുകാർ ഓടി എത്തി അപകടത്തിൽപ്പെട്ടവരെ രക്ഷപ്പെടുത്തുകയായിരുന്നു.പരിക്കേറ്റവരെ തിരുവനന്തപുരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.
Read Moreബിജെപിയുടെ നിരാഹാര സമരം ഇരുപത്തിയഞ്ചാം ദിവസത്തിലേക്ക്; ഒൻപതാം ദിനം പിന്നിട്ട് ശോഭാ സുരേന്ദ്രൻ
തിരുവനന്തപുരം: ശബരിമല വിഷയത്തിൽ ബിജെപി സെക്രട്ടറിയേറ്റിന് മുന്നിൽ നടത്തുന്ന നിരാഹാര സമരം ഇരുപത്തിയഞ്ചാം ദിവസത്തിലേക്ക് കടന്നു. ബിജെപി സംസ്ഥാന ജനറൽ സെക്രട്ടറി എ.എൻ.രാധാകൃഷ്ണൻ, ബിജെപി മുൻ സംസ്ഥാന പ്രസിഡന്റ് സി.കെ.പത്മനാഭൻ എന്നിവർക്ക് പിന്നാലെ ബിജെപി സംസ്ഥാന ജനറൽ സെക്രട്ടറി ശോഭാ സുരേന്ദ്രനാണ് ഇപ്പോൾ നിരാഹാരം അനുഷ്ഠിക്കുന്നത്. എ.എൻ.രാധാകൃഷ്ണനെയും സി.കെ.പത്മനാഭനെയും ആരോഗ്യനില വഷളായതിനെ തുടർന്ന് പോലീസ് അറസ്റ്റ് ചെയ്ത് ആശുപത്രിയിലേക്ക് മാറ്റിയിരുന്നു. ഇതേ തുടർന്നാണ് ശോഭാ സുരേന്ദ്രൻ നിരാഹാര സമരം ഏറ്റെടുത്തത്. ശോഭയുടെ നിരാഹാരം ഇന്ന് ഒൻപതാം ദിവസത്തിലേക്ക് കടന്നിരിക്കുകയാണ്. ആരോഗ്യനില വഷളായെങ്കിലും സമരത്തിൽ നിന്നും പിന്നോട്ടില്ലെന്നാണ് ശോഭ സുരേന്ദ്രൻ വ്യക്തമാക്കുന്നത്.
Read Moreആരും പങ്കെടുക്കരുത്; വനിതാമതിലിൽ കോൺഗ്രസ് പ്രവർത്തകർ പങ്കെടുക്കരുതെന്ന് കാട്ടി കെപിസിസിയുടെ സർക്കുലർ
തിരുവനന്തപുരം: ജനുവരി ഒന്നിനു സിപിഎം സംഘടിപ്പിക്കുന്ന വനിതാ മതിലിൽ കോണ്ഗ്രസ് പ്രവർത്തകർ പങ്കെടുക്കരുതെന്നു നിർദേശിച്ചു കെപിസിസി പ്രസിഡന്റ് മുല്ലപ്പള്ളി രാമചന്ദ്രൻ പാർട്ടി കീഴ്ഘടകങ്ങൾക്ക് കത്തയച്ചു. പ്രത്യക്ഷമായോ പരോക്ഷമായോ മതിലിനെ സഹായിക്കുന്ന ഒരു നടപടിയിലും കോണ്ഗ്രസ് -യുഡിഎഫ് ബന്ധമുള്ള ആരും ഏർപ്പെടരുത്. ചില കെപിസിസി, ഡിസിസി ഭാരവാഹികൾ അടക്കമുള്ളവർ സാമുദായിക സംഘടനകളുടെ പേരിൽ മതിലിന്റെ ഭാഗമാകുന്ന സാഹചര്യത്തിലാണു സർക്കുലർ. ചില കോണ്ഗ്രസ് നേതാക്കൾ മതിലിന്റെ സംഘാടക സമിതി ഭാരവാഹികളാണ്. സാമുദായിക സ്പർധ വളർത്തുകയും വർഗീയ ധ്രുവീകരണത്തിനു കാരണമാകുകയും ചെയ്യുന്ന വനിതാ മതിലിന്റെ ആവശ്യകത വ്യക്തമാതെ സർക്കാർ ഉരുണ്ടുകളി നടത്തുകയാണെന്നു സർക്കുലറിൽ പറയുന്നു.
Read Moreകേരളത്തിന്റെ നവോത്ഥാന പാരമ്പര്യം വർഗീയതയുടെ കോമരം തുള്ളലല്ലെന്ന് കോടിയേരി
തിരുവനന്തപുരം: കേരളത്തിന്റെ നവോത്ഥാന പാരന്പര്യം വർഗീയതയുടെ കോമരം തുള്ളലല്ലെന്ന് രമേശ് ചെന്നിത്തല മനസിലാക്കണമെന്നു സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ. വിചാരധാരയ്ക്ക് പകരം കോണ്ഗ്രസിന്റെ ചരിത്രം വായിച്ചുനോക്കിയാൽ ചെന്നിത്തലയ്ക്ക് ഇക്കാര്യം മനസിലാകുമെന്നു പറഞ്ഞ കോടിയേരി, വനിതാ മതിൽ മതപരമായ ചേരിതിരിവ് സൃഷ്ടിക്കുമെന്ന കെസിബിസിയുടെ ആശങ്കയ്ക്ക് അടിസ്ഥാനമില്ലെന്നും പറഞ്ഞു. വനിതാ മതിൽ മതപരമായ ചേരിതിരിവ് സൃഷ്ടിക്കുമെന്ന കെസിബിസിയുടെ ആശങ്ക തെറ്റിദ്ധാരണയാണ്. മതപരമായ ഒരു വിവേചനവുമില്ലാത്ത, ഒരു മതവിഭാഗത്തേയും അകറ്റിനിർത്താത്ത ഒരു നവോത്ഥാന വൻമതിലാണ് കേരളത്തിൽ ഉയരാൻ പോകുന്നത്. അത് ലോകമാകെ ശ്രദ്ധിക്കുന്ന ഒരു ചരിത്രഗാഥയായി മാറും- കോടിയേരി പറഞ്ഞു. ഹിന്ദുക്കളുടെ മൊത്തം അവകാശികളായി നിൽക്കാൻ ആർഎസ്എസ്-ബി ജെ പി സംഘപരിവാരത്തെ ആരാണ് ചുമതലപ്പെടുത്തിയത്. കേരളത്തിൽ ബിജെപിയിലും ആർഎസ്എസിലും ഉള്ളതിനേക്കാൾ എത്രയോ ഇരട്ടി ഹിന്ദുക്കൾ കമ്യൂണിസ്റ്റ് പ്രസ്ഥാനത്തിലും എൽഡിഎഫിലുമുണ്ട്. ഹിന്ദു, മുസ്ലീം, ക്രിസ്ത്യൻ എന്നൊക്കെ കള്ളികളിലാക്കി തിരിക്കാനും അത്തരത്തിൽ സംസാരിക്കാനും…
Read More