തൃപ്രയാർ: സഹപാഠിക്ക് കരുതലായി വിദ്യാർഥികൾ. നാട്ടിക എസ്എൻ ട്രസ്റ്റ് ഹയർസെക്കൻഡറി സ്കൂൾ എൻഎസ്എസ് വിദ്യാർഥികളാണ് ഒന്പതുവർഷമായി മുടങ്ങിയിരുന്ന സ്ഥലത്തിന്റെ രജിസ്ട്രേഷൻ പൂർത്തിയാക്കാൻ പണം കണ്ടെത്തി നൽകി മാതൃകയായത്.
വർഷങ്ങൾക്കുമുമ്പ് സ്ഥലം വാങ്ങുന്നതിനായി അഡ്വാൻസ് തുക നൽകിയിരുന്നുവെങ്കിലും ശേഷിച്ച തുക നൽകാൻ കഴിയാതെ രജിസ്ട്രേഷൻ നടപടികൾ നിലച്ചിരിക്കുകയായിരുന്നു. ഓരോ കുട്ടിയുടെയും വീട്ടിലേക്ക് അധ്യാപകർ നടത്തുന്ന സന്ദർശനത്തിനിടയിലാണ് വിദ്യാർഥിയുടെ ദുരവസ്ഥ മനസിലാക്കിയത്.
തുടർന്ന് എൻഎസ്എസ് വിദ്യാർഥികളുമായി ചർച്ച നടത്തി. ആവശ്യമായ തുക സമാഹരിക്കാൻ വിവിധ ചലഞ്ചുകൾ സംഘടിപ്പിച്ചു. വിദ്യാർഥികളും അധ്യാപകരും ചേർന്നുള്ള ഈ ശ്രമം വിജയകരമായി പൂർത്തിയാകുകയും റജിസ്ട്രേഷന് ആവശ്യമായ തുക കണ്ടെത്തുകയും ചെയ്തു.
ചടങ്ങിൽ പിടിഎ പ്രസിഡന്റ് പി.എസ്.പി. നസീർ, പ്രിൻസിപ്പൽ ജയബിനി എന്നിവരുടെ സാന്നിധ്യത്തിൽ പ്രോഗ്രാം ഓഫീസർ ശലഭ ശങ്കർ, എൻഎസ്എസ് ലീഡർമാരായ കെ.എസ്.ദേവദർശൻ, ഇ. എച്ച്.ശിവനന്ദ എന്നിവർചേർന്ന് ബാക്കിയുള്ള തുക കൈമാറി. എൻഎസ്എസ് വളണ്ടിയേഴ്സ് ആയ രോഷിത്ത് അരുൺ. ടി.എൻ.മുഹമ്മദ് അഷറഫ്, നിവ സാബു, ഹിബ സാജുദ്ദീൻ. റയാൻ ഷമീർ, എൻഎസ്എസ് അസിസ്റ്റന്റ് കോഓർഡിനേറ്ററായ ഇ.ബി.ഷൈജ തുടങ്ങിയവർ സംബന്ധിച്ചു.
