കൊച്ചി: വീണ്ടും ഇരുട്ടടി സമ്മാനിച്ച് രാജ്യത്ത് വാണിജ്യ ആവശ്യങ്ങള്ക്കുള്ള പാചകവാതക സിലിണ്ടര് വില വര്ധിപ്പിച്ചു. 19 കിലോ സിലിണ്ടറിന് 102 രൂപയാണ് എണ്ണക്കമ്പനികള് കൂട്ടിയത്.
വിലവര്ധനയോടെ പുതുക്കിയ വില 1842 രൂപയായി. കഴിഞ്ഞ ഒക്ടോബര് ഒന്നിന് വാണിജ്യ ആവശ്യത്തിനുള്ള സിലണ്ടറിന് 209 രൂപ കൂട്ടിയിരുന്നു. ഒരു മാസം പിന്നിടുമ്പോഴാണ് ഇന്ന് വീണ്ടും 102 രൂപ വര്ധിപ്പിച്ചത്.
സാധാരണ എണ്ണക്കമ്പനികള് ഒന്നാം തീയതി വില പുതുക്കി നിശ്ചയിക്കാറുണ്ട്. കഴിഞ്ഞ കുറെ ദിവസമായി രാജ്യാന്തര വിപണിയില് ക്രൂഡ് ഓയില് വില ഉള്പ്പെടെ ഉയരുന്ന സാഹചര്യമുണ്ട്. ഇതെല്ലാം കണക്കിലെടുത്താണ് വാണിജ്യാവശ്യത്തിനുള്ള സിലിണ്ടറിന്റെ വില 102 രൂപ കൂടി വര്ധിപ്പിച്ചതെന്നാണ് വിവരം.
വാണിജ്യാവശ്യത്തിനുള്ള സിലിണ്ടറിന്റെ വില വര്ധന ഹോട്ടല് മേഖലയിലുള്ളവര്ക്ക് തിരിച്ചടിയാകും.
അവശ്യസാധനങ്ങളുടെ വിലവര്ധനയ്ക്ക്പുറമെ പാചകവാതകത്തിന്റെയും വില പലപ്പോഴായി വര്ധിപ്പിക്കുന്നത് ഹോട്ടല് വ്യവസായത്തെതന്നെ പ്രതിസന്ധിയിലാക്കുകയാണെന്നാണ് ഈ മേഖലയിലുള്ളവര് പറയുന്നത്.