മയാമി: റൊമാനിയയുടെ സിമോണ ഹാലപ്പ് മയാമി ഓപ്പൺ ക്വാർട്ടറിൽ കടന്നു. അമേരിക്കൻ വെറ്ററൻ താരം വീനസ് വില്യംസിനെ പരാജയപ്പെടുത്തിയാണ് സിമോണ ക്വാർട്ടറിൽ കടന്നത്. നേരിട്ടുള്ള സെറ്റുകൾക്കായിരുന്നു വിജയം. സ്കോർ: 6-3, 6-3. വീനസിനെതിരെ സിമോണയുടെ തുടർച്ചയായ അഞ്ചാം വിജയമായിരുന്നു ഇത്.
ചെക്ക് താരം പെട്രാ ക്വിറ്റോവയും ക്വാർട്ടറിൽ കടന്നു. ഫ്രാൻസിന്‍റെ കരോളിനെ ഗാർസിയയെ നേരിട്ടുള്ള സെറ്റുകൾക്ക് വീഴ്ത്തിയാണ് ക്വിറ്റോവ അവസാന എട്ടിൽ എത്തിയത്. സ്കോർ: 6-3, 6-3. ടൂർണമെന്‍റിന് ഒടുവിൽ ലോക ഒന്നാം നമ്പർ സ്ഥാനത്തുനിന്നും നവോമി ഒസാക്ക‍യെ പുറത്താക്കി ക്വിറ്റോവയോ ഹാലപ്പോ കടന്നിരിക്കും.
പുരുഷ സിംഗിൾസിൽ റോജർ ഫെഡറർ നാലാം റൗണ്ടിലെത്തി. സെർബിയയുടെ ഫിലിപ് ക്രജിനോവിച്ചിനെ നേരിട്ടുള്ള സെറ്റുകൾക്ക് പരാജയപ്പെടുത്തിയാണ് ഫെഡററുടെ മുന്നേറ്റം. സ്കോർ: 7-5 6-3.
