ന്യൂഡൽഹി: ഇന്ത്യൻ സമുദ്രമേഖലയിലെ നിരീക്ഷണം കൂടുതൽ ശക്തമാക്കുന്നതിനായി രണ്ട് എംക്യു9 ബി സമുദ്രനിരീക്ഷണ ഡ്രോണുകൾ അമേരിക്കൻ പ്രതിരോധ കമ്പനിയായ ജനറൽ ആറ്റോമിക്സിൽനിന്ന് വാടകയ്ക്കെടുക്കാൻ ധാരണയിലെത്തി.
1,943 കോടി രൂപ ചെലവഴിച്ച് 30 മാസത്തേക്കാണ് കേന്ദ്ര പ്രതിരോധമന്ത്രാലയം ഈ കരാറിൽ ഒപ്പുവച്ചിരിക്കുന്നത്. അത്യാധുനിക സെൻസറുകളും സാങ്കേതികവിദ്യകളും അടങ്ങിയ ഈ ഡ്രോണുകൾക്ക് 40,000 അടിയിലധികം ഉയരത്തിൽ തുടർച്ചയായി 30 മണിക്കൂറിലധികം പറന്നു നിരീക്ഷണം നടത്താനും വിവരശേഖരണം തത്സമയം ലഭ്യമാക്കാനും സാധിക്കും.
സമുദ്രമേഖലയിലെ പ്രവർത്തനങ്ങൾക്കുപുറമെ അന്തർവാഹിനികളെ കണ്ടെത്തി നശിപ്പിക്കുന്ന ദൗത്യങ്ങൾക്കായും ഇവ ഉപയോഗിക്കാം. ഏകദേശം 25,000 കോടി രൂപയോളം ചെലവിൽ 31 എംക്യു9ബി ഡ്രോണുകൾ വാങ്ങാൻ ഇന്ത്യയും അമേരിക്കയും തമ്മിൽ ഒപ്പുവച്ച കരാറിനു പുറമെയാണ് ഇപ്പോഴത്തെ താത്കാലിക കരാർ. കരാർ പൂർണമാകുന്നതുവരെ സമുദ്ര അതിർത്തികളിലെ സുരക്ഷ ഉറപ്പാക്കുകയാണ് താത്കാലിക കരാറുകൊണ്ട് ലക്ഷ്യമിടുന്നത്.
- സ്വന്തം ലേഖകൻ
