ന്യൂഡൽഹി: ചരിത്രപ്രസിദ്ധമായ മുത്തലാഖ് കേസിൽ ഹർജിക്കാരിയായിരുന്ന ഇഷ്രത്ത് ജഹാനുവേണ്ടി വാദിച്ച സുപ്രീംകോടതി അഭിഭാഷകയും ബിജെപി നേതാവുമായ നസിയ ഇലാഹി ഖാൻ താൻ സനാതന ധർമം സ്വീകരിക്കുകയാണെന്ന് പ്രഖ്യാപിച്ചു. പശ്ചിമ ബംഗാൾ സ്വദേശിയായ നസിയയുടെ ഈ തീരുമാനം സോഷ്യൽ മീഡിയയിലും രാഷ്ട്രീയ വൃത്തങ്ങളിലും വലിയ ചർച്ചകൾക്ക് വഴിവെച്ചിട്ടുണ്ട്.
2017-ൽ മുസ്‌ലിം സമുദായത്തിലെ മുത്തലാഖ് സമ്പ്രദായത്തെ ചോദ്യം ചെയ്തുകൊണ്ട് സുപ്രീംകോടതിയെ സമീപിച്ച പ്രധാന ഹർജിക്കാരികളിൽ ഒരാളായ ഇഷ്രത്ത് ജഹാനുവേണ്ടി വാദിച്ചതിലൂടെയാണ് നസിയ ദേശീയ ശ്രദ്ധ നേടിയത്. തുടർന്ന് 2018-ൽ അവർ ബിജെപിയിൽ ചേരുകയും ന്യൂനപക്ഷ മോർച്ചയുമായി സഹകരിച്ച് പ്രവർത്തിക്കുകയും ചെയ്തു.
അടുത്തിടെ മധ്യപ്രദേശിലെ ഉജ്ജൈനിലുള്ള രാം ഘട്ടിൽ വെച്ച് സർവ്വ പിതൃ അമാവാസി ദിനത്തിൽ അവർ പരമ്പരാഗത ഹൈന്ദവ ആചാരപ്രകാരമുള്ള ശ്രദ്ധ, തർപ്പണ ചടങ്ങുകൾ നടത്തിയതിന്‍റെ ദൃശ്യങ്ങൾ സാമൂഹിക മാധ്യമങ്ങളിൽ വ്യാപകമായി പ്രചരിച്ചിരുന്നു. തന്‍റെ പൂർവികരോടുള്ള കൃതജ്ഞതയുടെ ഭാഗമായാണ് ഈ ചടങ്ങുകൾ നടത്തിയതെന്നും അവർ വ്യക്തമാക്കി. തന്‍റെ പൂർവികരുടെ യഥാർഥ ചരിത്രം അംഗീകരിക്കാൻ ആഗ്രഹിക്കുന്നതുകൊണ്ടാണ് ഈ തീരുമാനമെന്നും അവർ കൂട്ടിച്ചേർത്തു.
ഉത്തർപ്രദേശിലെ ലോണിയിൽ നിന്നുള്ള ബിജെപി എംഎൽഎ നന്ദ് കിഷോർ ഗുർജർ തനിക്കൊരു പിതാവിനെപ്പോലെയാണെന്ന് വിശേഷിപ്പിച്ച നസിയ, തനിക്ക് സ്വന്തം ഗോത്രം നൽകാൻ അദ്ദേഹം സന്നദ്ധനാണെന്നും മാധ്യമങ്ങളോട് പറഞ്ഞു. ഈ പ്രഖ്യാപനം സാമൂഹിക മാധ്യമങ്ങളിൽ ഘർ വാപ്പസി ചർച്ചകൾക്ക് തുടക്കമിട്ടുണ്ട്.
