ന്യൂഡൽഹി: ഇന്ത്യൻ ഒളിംപിക് അസോസിയേഷനിലെ (ഐഒഎ) സ്പോർട്സ് പേഴ്സൺസ് ഓഫ് ഔട്ട്സ്റ്റാൻഡിംഗ് മെറിറ്റ് (എസ്ഒഎം) തെരഞ്ഞെടുപ്പുമായി ബന്ധപ്പെട്ട വിവാദത്തിൽ പി.ടി. ഉഷയുടെ ആരോപണങ്ങൾക്ക് മറുപടിയുമായി അഞ്ജു ബോബി ജോർജ്. തെരഞ്ഞെടുപ്പിൽ ക്രമക്കേട് നടന്നെന്ന ആരോപണങ്ങൾ ഉന്നയിക്കുന്നവർ അതിന് കൃത്യമായ തെളിവുകൾ നൽകണമെന്നും അഞ്ജു ആവശ്യപ്പെട്ടു.
തെരഞ്ഞെടുപ്പിൽ ജയവും തോൽവിയും സ്വാഭാവികമാണെന്നും രണ്ടിനെയും ഒരേ മനോഭാവത്തോടെ അംഗീകരിക്കാൻ എല്ലാവരും തയ്യാറാകണമെന്നും അവർ പറഞ്ഞു. പരാതികളുണ്ടെങ്കിൽ ബന്ധപ്പെട്ട ഔദ്യോഗിക സംവിധാനങ്ങളെ സമീപിക്കുകയാണ് വേണ്ടതെന്നും അഞ്ജു വ്യക്തമാക്കി.
എസ്ഒഎം തെരഞ്ഞെടുപ്പിൽ 53 വോട്ടുകൾ നേടിയാണ് അഞ്ജു ബോബി ജോർജ് ഒന്നാമതെത്തിയത്. ലഭിച്ച പിന്തുണ കായികരംഗത്ത് ഇതുവരെ നടത്തിയ പ്രവർത്തനങ്ങൾക്കുള്ള വലിയ അംഗീകാരമായാണ് കാണുന്നതെന്നും അവർ പ്രതികരിച്ചു. തനിക്ക് വോട്ട് ചെയ്തത് ആരൊക്കെയാണെന്ന് മുൻകൂട്ടി പറയാൻ കഴിയില്ലെന്നും അഞ്ജു കൂട്ടിച്ചേർത്തു.
അതേസമയം, വരാനിരിക്കുന്ന ഐഒഎ പ്രസിഡന്‍റ് തെരഞ്ഞെടുപ്പിൽ മത്സരിക്കാനുള്ള സാധ്യതകൾ അഞ്ജു പൂർണമായി തള്ളിയിട്ടില്ല. മറുവശത്ത്, എസ്ഒഎം തെരഞ്ഞെടുപ്പിൽ 40 വോട്ടുകൾ മാത്രം നേടി അഞ്ചാം സ്ഥാനത്തേക്ക് പിന്തള്ളപ്പെട്ട പി.ടി. ഉഷയ്ക്ക് ഭരണസമിതിയിലെ അംഗത്വവും നഷ്ടമായിരുന്നു. ഇതോടെ ഐഒഎയിലെ അധികാരത്തർക്കം കൂടുതൽ ചർച്ചയാകുകയാണ്.
