ചൈനയിലെ ഒരു കൊച്ചു ഗ്രാമത്തിൽ നിന്നുള്ള അഞ്ചുവയസ്സുകാരന്റെ അതിഥിസൽക്കാരം സോഷ്യൽ മീഡിയയിൽ തരംഗമാകുന്നു. വഴിയിലൂടെ സൈക്കിളിൽ പോയ വിദേശിയായ യുവാവിനെ സ്നേഹപൂർവ്വം തടഞ്ഞുനിർത്തി സ്വന്തം ഭക്ഷണശാലയിൽ എത്തിച്ച് ഫ്രൈഡ് റൈസ് കഴിപ്പിച്ച കൊച്ചുമിടുക്കന്റെ വീഡിയോയാണ് ലക്ഷക്കണക്കിന് ആളുകളുടെ ഹൃദയം കവരുന്നത്.
‘SJ in China’ എന്ന ഇൻസ്റ്റാഗ്രാം പേജിലൂടെ പങ്കുവെച്ച ഈ മനോഹര വീഡിയോ ഇതിനകം രണ്ടരക്കോടിയിലധികം ആളുകളാണ് കണ്ടത്.
സൈക്കിളിൽ യാത്ര ചെയ്യുകയായിരുന്ന യുവാവിനെ തടഞ്ഞുനിർത്തി “ഞങ്ങളുടെ റെസ്റ്റോറന്റിൽ നിന്ന് ഭക്ഷണം കഴിക്കുന്നോ?” എന്ന് ചോദിച്ചുകൊണ്ടാണ് കുട്ടി സംഭാഷണം ആരംഭിക്കുന്നത്. താൻ ഭക്ഷണം കഴിച്ചു കഴിഞ്ഞു എന്ന് യുവാവ് പറഞ്ഞെങ്കിലും, കുട്ടി പിന്മാറാതെ തൊട്ടടുത്തുള്ള മറ്റൊരാളോട് ചോദ്യം ആവർത്തിച്ചു.
തുടർന്ന് കുട്ടി തന്നെയാണ് ഈ കടയിലെ ബോസ് എന്ന് തികഞ്ഞ ആത്മവിശ്വാസത്തോടെ പറഞ്ഞു. “ഇവിടെ എന്താണ് നല്ലത്?” എന്ന ചോദ്യത്തിന് “നിങ്ങൾക്ക് ഇഷ്ടമുള്ളത് തെരഞ്ഞെടുക്കാം” എന്നായിരുന്നു കുട്ടിയുടെ മറുപടി. ഒടുവിൽ കുട്ടിയുടെ മിടുക്കിൽ സന്തോഷം തോന്നിയ യുവാവ് ഫ്രൈഡ് റൈസ് ഓർഡർ ചെയ്യാൻ തയ്യാറാവുകയായിരുന്നു.
യുവാവിനെ കൈപിടിച്ച് റെസ്റ്റോന്റിനുള്ളിലേക്ക് കൂട്ടിക്കൊണ്ടുപോയ കൊച്ചുമിടുക്കൻ, കടയിലുണ്ടായിരുന്ന സ്ത്രീയോട് കാര്യങ്ങൾ വിശദീകരിച്ചു. തുടർന്ന് യുവാവിന് ഇരിക്കാനുള്ള സീറ്റ് കാണിച്ചുകൊടുക്കുകയും കൈയ്യിൽ ചോപ്സ്റ്റിക്കുകൾ നൽകുകയും ചെയ്തു.
റൈസ് ബൗളിലേക്ക് പകർന്ന് സാവധാനം കഴിക്കാൻ നിർദ്ദേശിച്ച കുട്ടി, യുവാവിന് കുടിക്കാൻ സോഫ്റ്റ് ഡ്രിങ്കും എത്തിച്ചുനൽകി. ഒരു മികച്ച റെസ്റ്റോറന്റ് മാനേജരെപ്പോലെ അതിഥിയെ സൽക്കരിച്ച ഈ അഞ്ചുവയസുകാരനാണ് ഇപ്പോൾ സോഷ്യൽ മീഡിയയിലെ താരം.
