ആപ്പിളിന്‍റെ ഏറ്റവും ഉയർന്ന ഫീച്ചറുകളുള്ള മാക്ബുക്ക് പ്രോയുടെ വിലയും, ഇന്ത്യയിലെ ജനപ്രിയ എസ്‌യുവിയായ ഹ്യുണ്ടായ് ക്രെറ്റയുടെ വിലയും തമ്മിലുള്ള രസകരമായ താരതമ്യം സമൂഹ മാധ്യമങ്ങളിൽ ശ്രദ്ധ നേടുന്നു. മാക്ബുക്കിന്‍റെ ഏറ്റവും കൂടിയ പതിപ്പിന് ഒരു ജനപ്രിയ കാറിന്‍റെ അത്രയും തന്നെ വില വരുമെന്ന് ഈ വീഡിയോ വ്യക്തമാക്കുന്നു.
ഇൻസ്റ്റാഗ്രാം ഉപയോക്താവായ മൊഹ്സിൻ പങ്കുവെച്ച വീഡിയോയിലാണ് ഈ വില താരതമ്യമുള്ളത്. ഹ്യുണ്ടായ് ക്രെറ്റ വാങ്ങിയവർ അത് വിറ്റ് ആപ്പിളിന്‍റെ പുതിയ മാക്ബുക്ക് പ്രോ വാങ്ങാൻ അദ്ദേഹം തമാശയായി നിർദ്ദേശിക്കുന്നു.
ബേസ് മോഡലിന് 3.5 ലക്ഷം രൂപയോളം വിലവരുമെങ്കിലും, 16 ഇഞ്ച് സ്പേസ് ബ്ലാക്ക് വേർഷനും നാനോ-ടെക്സ്ചർ ഡിസ്പ്ലേ, ഏറ്റവും പുതിയ M5 മാക്സ് ചിപ്പ്, പരമാവധി മെമ്മറി, സ്റ്റോറേജ് തുടങ്ങിയ എല്ലാ പ്രീമിയം അപ്ഗ്രേഡുകളും ചേർക്കുമ്പോൾ നികുതി ഉൾപ്പെടെ ഏകദേശം 17,97,800 രൂപയാണ് (ഏകദേശം 18 ലക്ഷം രൂപ) ഇതിന്‍റെ വില വരുന്നത്.
ഇത് ഇഎംഐ വഴി വാങ്ങുകയാണെങ്കിൽ പോലും മാസത്തിൽ 1,61,000 രൂപ അടയ്ക്കേണ്ടി വരുമെന്നും അദ്ദേഹം ചൂണ്ടിക്കാണിക്കുന്നു. തുടർന്ന് “നിങ്ങൾ ഒരു ക്രെറ്റയാണോ അതോ മാക്ബുക്ക് പ്രോ ആണോ തെരഞ്ഞെടുക്കുക?” എന്ന് ചോദിച്ചുകൊണ്ടാണ് വീഡിയോ അവസാനിക്കുന്നത്.
ഡൽഹി-എൻസിആർ മേഖലയിലെ ഹ്യുണ്ടായ് ക്രെറ്റയുടെ ഓൺ-റോഡ് വില വേരിയന്‍റിന് അനുസരിച്ച് ഏകദേശം 12.68 ലക്ഷം രൂപ മുതൽ 24.15 ലക്ഷം രൂപ വരെയാണ്. അതായത്, പൂർണമായി അപ്ഗ്രേഡ് ചെയ്ത ആപ്പിൾ മാക്ബുക്ക് പ്രോയുടെ വില ക്രെറ്റയുടെ പല വേരിയന്‍റുകളെക്കാളും കൂടുതലാണ്!
രണ്ടും തികച്ചും വ്യത്യസ്ത ആവശ്യങ്ങൾക്കായി ഉപയോഗിക്കുന്ന ഉൽപ്പന്നങ്ങളാണെങ്കിലും, ആപ്പിളിന്‍റെ ഏറ്റവും ഉയർന്ന പതിപ്പ് ലാപ്ടോപ്പുകളുടെ ഭീമമായ വിലയെക്കുറിച്ചുള്ള ഈ രസകരമായ വീഡിയോ വലിയ രീതിയിലാണ് ആളുകൾ ഏറ്റെടുത്തിരിക്കുന്നത്.
