വാഹനത്തിലെ അസാധാരണമായ നമ്പർ പ്ലേറ്റിനെക്കുറിച്ചുള്ള പരാതിക്ക് ഹൈദരാബാദ് ട്രാഫിക് പോലീസ് നൽകിയ മറുപടി സോഷ്യൽ മീഡിയയിൽ വൻ ചിരിക്ക് വഴിതെളിച്ചു. അബദ്ധം മനസിലായതോടെ പോലീസ് മറുപടി ഡിലീറ്റ് ചെയ്തെങ്കിലും, സംഭവം ഇതിനകം തന്നെ വൈറലായിക്കഴിഞ്ഞു.
ഒക്ടോബർ 24ന് ഹൈദരാബാദിലെ പഞ്ചഗുട്ട സിഗ്നലിന് സമീപം കണ്ട ഒരു ഇലക്ട്രിക് വാഹനത്തിന്‍റെ ചിത്രമാണ് ‘സെരീഷ്’ എന്ന എക്സ് ഉപയോക്താവ് പങ്കുവെച്ചത്. ‘5121’ എന്ന നമ്പർ ‘SRI’ എന്ന് തോന്നിക്കുന്ന രീതിയിലായിരുന്നു അതിൽ പതിപ്പിച്ചിരുന്നത്. നിയമവിരുദ്ധമായ ഈ നമ്പർ പ്ലേറ്റിന്‍റെ ചിത്രം പങ്കുവെച്ച് പോലീസിനെയും മോട്ടോർ വാഹന വകുപ്പിനെയും ടാഗ് ചെയ്തുകൊണ്ട്, “ഇതുപോലെ എനിക്കും നമ്പർ എഴുതാൻ സാധിക്കുമോ?” എന്ന് ഉപയോക്താവ് പരിഹാസരൂപേണ ചോദിക്കുകയായിരുന്നു.
വാഹനത്തിന്‍റെ പുറകിലെ നമ്പർ പ്ലേറ്റ് വ്യക്തമായി കാണാവുന്ന ചിത്രമായിരുന്നു അത്. എന്നാൽ ഇതിന് ഹൈദരാബാദ് ട്രാഫിക് പോലീസ് നൽകിയ മറുപടിയാണ് എല്ലാവരെയും അമ്പരപ്പിച്ചത്:
“സർ, വാഹനം പുറകിൽ നിന്ന് എടുത്ത ചിത്രമായതിനാൽ നിയമലംഘനം വ്യക്തമല്ല. ആവശ്യമായ നടപടി സ്വീകരിക്കുന്നതിനായി ദയവായി വാഹനത്തിന്‍റെ മുൻവശത്ത് നിന്നുള്ള വ്യക്തമായ ചിത്രം പങ്കുവെക്കുക.”
പിൻവശത്തെ നമ്പർ പ്ലേറ്റിലെ തട്ടിപ്പ് വ്യക്തമായി കാണാമായിരുന്നിട്ടും മുൻവശത്തെ ചിത്രം ചോദിച്ച പോലീസിന്റെ മറുപടി കണ്ട് നെറ്റിസൺസ് ഒന്നടങ്കം മൂക്കത്ത് വിരൽവെച്ചു. ട്രാഫിക് പോലീസിന് കണ്ണ് പരിശോധന നടത്തേണ്ട സമയമായി എന്ന് തുടങ്ങി നിരവധി ട്രോളുകളാണ് പോസ്റ്റിന് താഴെ നിറഞ്ഞത്. അബദ്ധം തിരിച്ചറിഞ്ഞ പോലീസ് ഉടൻ തന്നെ പഴയ കമന്‍റ് ഡിലീറ്റ് ചെയ്യുകയും പുതിയ മറുപടി നൽകുകയും ചെയ്തു.
“ചൂണ്ടിക്കാണിച്ചതിന് നന്ദി. നമ്പർ പ്ലേറ്റിലെ അപാകത വ്യക്തമാണ്. നിയമങ്ങൾ മുൻവശത്തെയും പിൻവശത്തെയും പ്ലേറ്റുകൾക്ക് ഒരുപോലെ ബാധകമാണ്.”
മോട്ടോർ വാഹന നിയമപ്രകാരം ഉടമയ്‌ക്കെതിരെ നടപടി സ്വീകരിച്ചു വരികയാണെന്നും, നിശ്ചിത മാനദണ്ഡങ്ങളുള്ള എച്ച്എസ്ആർപി (HSRP) നമ്പർ പ്ലേറ്റുകൾ മാത്രമേ ഉപയോഗിക്കാവൂ എന്നും പോലീസ് പിന്നീട് വ്യക്തമാക്കി. പോലീസിന് പറ്റിയ ഈ ചെറിയ അബദ്ധമാണ് ഇപ്പോൾ ഇന്‍റർനെറ്റിലെ പ്രധാന ചർച്ചാവിഷയം.
