ഹൃദയാഘാതം അനുഭവപ്പെട്ടിട്ടും അവസാന നിമിഷം വരെ പതറാതെ പ്രവർത്തിച്ച് 40 യാത്രക്കാരുടെ ജീവൻ രക്ഷിച്ച ആന്ധ്രാപ്രദേശ് ആർടിസി ഡ്രൈവർക്ക് ദാരുണാന്ത്യം. കാക്കിനട-വിശാഖപട്ടണം റൂട്ടിൽ തുനിക്ക് സമീപമാണ് സംഭവം. ആന്ധ്രാപ്രദേശ് സ്റ്റേറ്റ് റോഡ് ട്രാൻസ്‌പോർട്ട് കോർപ്പറേഷൻ ഡ്രൈവറായ 34 കാരൻ ജെട്ടി ശിവയാണ് മരിച്ചത്.
ഏകദേശം 40 യാത്രക്കാരുമായി പോവുകയായിരുന്ന ബസ് ഓടിക്കുന്നതിനിടയിലാണ് ശിവയ്ക്ക് പെട്ടെന്ന് ഹൃദയാഘാതം അനുഭവപ്പെട്ടത്. ഗുരുതരമായ ആരോഗ്യപ്രശ്നമുണ്ടായപ്പോഴും സമചിത്തത കൈവിടാത്ത അദ്ദേഹം ബസ് ഒതുക്കി സുരക്ഷിതമായി റോഡരികിൽ നിർത്തുകയായിരുന്നു. ബസ് പൂർണമായി നിർത്തിയ ഉടനെത്തുടർന്ന് അദ്ദേഹം സ്റ്റീയറിംഗിൽ കുഴഞ്ഞുവീഴുകയായിരുന്നു.
ഉടൻതന്നെ അദ്ദേഹത്തെ അടുത്തുള്ള ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഡോക്ടർമാർ അദ്ദേഹം മരിച്ചതായി സ്ഥിരീകരിച്ചു. തന്‍റെ അവസാന നിമിഷങ്ങളിലും ഉത്തരവാദിത്തബോധം കൈവിടാതെ യാത്രക്കാരുടെ സുരക്ഷ ഉറപ്പാക്കിയ ഡ്രൈവർ ശിവയുടെ സമയോചിത ഇടപെടലിനെ പ്രശംസിച്ച് നിരവധി പേരാണ് രംഗത്തെത്തിയത്.
എപിഎസ്ആർടിസി ചെയർമാൻ കൊനകല്ല നാരായണ റാവു ശിവയുടെ നിര്യാണത്തിൽ അനുശോചനം രേഖപ്പെടുത്തി. കടുത്ത ശാരീരിക അസ്വസ്ഥതകൾക്കിടയിലും അദ്ദേഹം കാണിച്ച ധീരതയും യാത്രാ സുരക്ഷയോടുള്ള ആത്മാർത്ഥതയും എക്കാലവും ഓർമിക്കപ്പെടുമെന്നും, ശിവയുടെ കുടുംബത്തിന് എല്ലാവിധ പിന്തുണയും സഹായങ്ങളും കോർപ്പറേഷൻ ഉറപ്പുനൽകുമെന്നും അദ്ദേഹം വ്യക്തമാക്കി.
