ബോംബെ ഷേവിംഗ് കമ്പനി സ്ഥാപകൻ ശന്തനു ദേശ്പാണ്ഡെ 21 വർഷത്തിനുശേഷം തന്‍റെ പ്രിയപ്പെട്ട ഗണിതശാസ്ത്ര അധ്യാപകനെ വീണ്ടും കണ്ടുമുട്ടിയതാണ് ഇപ്പോൾ സോഷ്യൽ മീഡിയയിൽ ചർച്ച‍യാകുന്നത്. ലിങ്ക്ഡ്ഇനിൽ പങ്കുവച്ച വിഡിയോയിലൂടെയാണ് ശന്തനു ഈ വൈകാരിക അനുഭവം പങ്കുവച്ചത്. 2005ൽ ഐഐടി പ്രവേശന പരീക്ഷാ ഫലം വന്ന സമയത്തുണ്ടായ ഒരു സംഭവമാണ് അദ്ദേഹം ഓർത്തെടുത്തത്.
2005ൽ ഐഐടി പരീക്ഷാഫലം വന്നപ്പോൾ ആദ്യം വിളിച്ചത് കോട്ടയിൽ തന്നെ പഠിപ്പിച്ചിരുന്ന ഗണിതശാസ്ത്ര അധ്യാപകനായ ജെജെ സാറിനെയായിരുന്നുവെന്ന് ശന്തനു പറയുന്നു. അന്ന് ഏറെ നിരാശയിലായിരുന്ന തന്നെ ആശ്വസിപ്പിച്ചത് അധ്യാപകന്‍റെ വാക്കുകളായിരുന്നു.
‘ഇന്ന് നിങ്ങൾക്ക് ഈ കാര്യം വളരെ വലുതായി തോന്നുന്നുണ്ടാകും. പക്ഷേ ജീവിതത്തിൽ നിങ്ങളുടെ കഴിവിന്‍റെ പരമാവധി ചെയ്യുക, ബാക്കിയെല്ലാം മറക്കുക. എല്ലാം നന്നായി വരും’ എന്നായിരുന്നു അധ്യാപകന്‍റെ ഉപദേശം.
രണ്ട് പതിറ്റാണ്ടിലേറെ കഴിഞ്ഞിട്ടും ആ വാക്കുകൾ മനസിൽ മായാതെ നിൽക്കുന്നുവെന്നും ശന്തനു പറയുന്നു.21 വർഷത്തിനുശേഷം അതേ ശബ്ദം വീണ്ടും കേട്ടപ്പോൾ അദ്ദേഹം അന്നത്തെ ആ 18കാരനായി വീണ്ടും മാറി. ‘ജെജെ സർ’ എന്ന് സ്നേഹത്തോടെ വിളിച്ചിരുന്ന അധ്യാപകനെ കണ്ടപ്പോൾ പഴയ വിദ്യാർഥി ഓർമകളിലേക്ക് മടങ്ങുകയായിരുന്നു.
