രാജ്യമെങ്ങും ദീപാവലി ആഘോഷങ്ങൾ തകൃതിയായി നടക്കുന്നതിനിടെ ഇന്ത്യൻ ആരാധകർക്ക് അപ്രതീക്ഷിത സമ്മാനവുമായി എത്തിയിരിക്കുകയാണ് ബിടിഎസ് താരം കിം തേഹ്യുങ്‌വി. ദീപാവലി ആഘോഷിക്കുന്ന എല്ലാ ഇന്ത്യൻ ആരാധകർക്കും ഹിന്ദിയിൽ ആശംസകൾ നേർന്ന താരത്തിന്‍റെ സന്ദേശം സമൂഹമാധ്യമങ്ങളിൽ വൈറലായി.
വീവേഴ്‌സ് ആപ്പിലെ സംവാദത്തിനിടെയാണ് ഇന്ത്യൻ ആരാധകർക്ക് വി ദീപാവലി ആശംസകൾ നേർന്നത്. ഇന്ത്യയിൽ ദീപാവലി ആഘോഷിക്കുകയാണെന്നും ഈ ഉത്സവത്തെക്കുറിച്ച് അറിയാമോയെന്നും ഒരു ആരാധകൻ താരത്തോട് ചോദിച്ചു. ഒപ്പം താരത്തിന് ഇഷ്ടപ്പെട്ട മധുരപലഹാരങ്ങളുടെ ചിത്രങ്ങളും പങ്കുവച്ചു.
ദീപാവലി എന്തുതരം ആഘോഷമാണെന്നും അതിനെക്കുറിച്ച് അറിയാൻ ആഗ്രഹമുണ്ടെന്നും വി മറുപടി നൽകി. ഇതോടെ ഇന്ത്യൻ ആരാധകർ ദീപാവലിയുടെ പ്രത്യേകതകളും ആചാരങ്ങളും താരത്തിന് പരിചയപ്പെടുത്തി.
പിന്നാലെയായിരുന്നു ആരാധകരെ ആവേശത്തിലാക്കിയ ആ സന്ദേശം. ഹിന്ദിയിൽ ‘ദിവാലി മുബാറക്’ (ദീപാവലി ആശംസകൾ) എന്ന് കുറിച്ചാണ് വി ഇന്ത്യൻ ആരാധകർക്ക് ആശംസകൾ നേർന്നത്.
