ട്രെയിനിൽ ഫസ്റ്റ് എസി കൂപ്പിൽ യാത്ര ചെയ്യുകയായിരുന്ന യുവതിയുടെ ലോക്ക് ചെയ്ത ക്യാബിനിൽ നിന്ന് ലക്ഷക്കണക്കിന് രൂപയുടെ ആഭരണങ്ങളും പണവും കവർന്നു. ആനന്ദ് വിഹാർ ടെർമിനൽ – ന്യൂ ജൽപായ്ഗുരി എക്സ്പ്രസിൽ ലഖ്‌നൗ സ്റ്റേഷനിൽ വെച്ചാണ് സംഭവം. 2.5 ലക്ഷം രൂപയുടെ ആഭരണങ്ങളും 25,000 രൂപയുമാണ് മോഷണം പോയത്.
ഫസ്റ്റ് എസി കൂപ്പിൽ സുരക്ഷിതമെന്ന് കരുതി യാത്ര ചെയ്തിരുന്ന തന്നെ ഞെട്ടിച്ചുകൊണ്ടാണ് മോഷണം നടന്നതെന്ന് യുവതി പറഞ്ഞു. തന്‍റെ ന്റെ കുട്ടിയെ തട്ടിക്കൊണ്ടുപോയില്ലെന്ന ആശ്വാസം മാത്രമാണ് ബാക്കിയുള്ളതെന്നും, ലോക്ക് ചെയ്ത ക്യാബിനിൽ പോലും യാത്രക്കാർക്ക് സുരക്ഷയില്ലേ എന്നും അവർ പൊട്ടിക്കരഞ്ഞുകൊണ്ട് ചോദിച്ചു.
അടിയന്തര ഘട്ടങ്ങളിൽ ഉപയോഗിക്കുന്ന ചെയിൻ നാല് തവണ വലിച്ചിട്ടും റെയിൽവേ പ്രൊട്ടക്ഷൻ ഫോഴ്‌സിന്റെയോ (RPF) മറ്റ് ഉദ്യോഗസ്ഥരുടെയോ ഭാഗത്തുനിന്ന് യാതൊരുവിധ സഹായവും ലഭിച്ചില്ലെന്ന് യുവതി ആരോപിച്ചു. സമൂഹമാധ്യമങ്ങളിൽ വൈറലായ ഈ വീഡിയോയ്ക്ക് പിന്നാലെ നോർത്തേൺ റെയിൽവേയുടെ ലഖ്‌നൗ ഡിവിഷൻ സംഭവത്തിൽ പ്രതികരിച്ചു.
ആർപിഎഫിനെയും ഉത്തർപ്രദേശ് ഗവൺമെന്‍റ് റെയിൽവേ പോലീസിനെയും ടാഗ് ചെയ്തുകൊണ്ട് വിഷയം അന്വേഷിക്കാൻ നിർദ്ദേശം നൽകിയിട്ടുണ്ട്. ട്രെയിനുകളിലെ സുരക്ഷാ സംവിധാനങ്ങളെ ചോദ്യം ചെയ്തുകൊണ്ട് നിരവധി പേരാണ് ഇതിനെതിരെ രംഗത്തെത്തിയിട്ടുള്ളത്.
