ഓടുന്ന ട്രക്കിന്റെ ഡ്രൈവിംഗ് സീറ്റിൽ നിന്ന് പുറത്തിറങ്ങി ട്രക്കിന് മുകളിൽ കയറി നൃത്തം ചെയ്ത ഡ്രൈവറുടെ ഭീതിജനകമായ വീഡിയോ സോഷ്യൽ മീഡിയയിൽ വൈറലാകുന്നു. ഡ്രൈവറുടെ അപകടകരമായ ഈ അഭ്യാസ പ്രകടനത്തിനെതിരെ വ്യാപക ജനരോഷമാണ് ഉയരുന്നത്.
ഓടിക്കൊണ്ടിരിക്കുന്ന വാഹനത്തിനുള്ളിൽ നിന്ന് പെട്ടെന്ന് എഴുന്നേറ്റ ഡ്രൈവർ ട്രക്കിന്റെ ക്യാബിന് മുകളിലേക്ക് കയറി നൃത്തം ചെയ്യുന്നതാണ് വീഡിയോയിലുള്ളത്. തുടർന്ന് വശത്തെ ജനലിലൂടെയാണ് ഇയാൾ തിരികെ സീറ്റിലേക്ക് കയറുന്നത്. ഇത്രയും കൊണ്ടും നിർത്താതെ, വാഹനം ഓടിക്കുന്നതിനിടയിൽ ഡോർ തുറന്ന് വശത്തെ ലഡ്ജിൽ കയറി നിന്നും ഇയാൾ നൃത്തം തുടർന്നു.
റോഡിലുണ്ടായിരുന്ന മറ്റു യാത്രക്കാരുടെ ജീവൻ അപകടത്തിലാക്കുന്ന ഈ പ്രവർത്തനം ഒരു ഭീകരാക്രമണത്തിന് തുല്യമാണെന്നും ഇയാളുടെ ഡ്രൈവിംഗ് ലൈസൻസ് റദ്ദാക്കണമെന്നും ആവശ്യപ്പെട്ട് നിരവധി പേരാണ് രംഗത്തെത്തിയിരിക്കുന്നത്. ട്രക്ക് രാജസ്ഥാൻ രജിസ്ട്രേഷനിലുള്ളതായതിനാൽ ഉടനടി അന്വേഷണം നടത്തി കർശന നടപടി സ്വീകരിക്കണമെന്നാവശ്യപ്പെട്ട് സോഷ്യൽ മീഡിയ ഉപയോക്താക്കൾ വീഡിയോ രാജസ്ഥാൻ പോലീസിന് ടാഗ് ചെയ്യുകയാണ്.
