കൊച്ചി: പതിനെട്ട് വയസുവരെയുള്ള കുട്ടികളിലെ സ്ക്രീന് ഉപയോഗം നിയന്ത്രിക്കുന്നതിന് നിയമം കൊണ്ടുവരണമെന്ന് ബാലാവകാശ കമ്മീഷന് ഉത്തരവായി.
നിയമം നിര്മിക്കുന്നതിന് പൊതുവിദ്യാഭ്യാസ വകുപ്പ് പ്രിന്സിപ്പല് സെക്രട്ടറിയുടെ നേതൃത്വത്തില് ഉന്നതതല സമിതി രൂപീകരിച്ച് തുടര്നടപടി സ്വീകരിക്കണമെന്ന് ബാലാവകാശ കമ്മിഷന് ചെയര്പേഴ്സണ് കെ.വി. മനോജ്കുമാര്, അംഗം ഷാജേഷ് ഭാസ്കര് എന്നിവരുടെ ഡിവിഷന് ബെഞ്ചാണ് ഉത്തരവ് പുറപ്പെടുവിച്ചത്. വനിതാശിശു വികസന വകുപ്പ് പ്രിന്സിപ്പല് സെക്രട്ടറിയും ആരോഗ്യം, നിയമം, ഇലക്ട്രോണിക്സ് ഇന്ഫര്മേഷന് ടെക്നോളജി എന്നീ വകുപ്പ് സെക്രട്ടറിമാരും, സംസ്ഥാന പോലീസ് മേധാവിയും ഉള്പ്പെടുന്നതാകണം ഉന്നതതല സമിതി.
കോവിഡിനുശേഷം സ്ക്രീന് അഡിക്ഷന് കുട്ടികളില് വലിയ പ്രശ്നങ്ങള് സൃഷ്ടിക്കുന്നുണ്ട്. ഇന്റര്നെറ്റ്, മൊബൈല് ഗെയിമുകള്, സോഷ്യല് മീഡിയ എന്നിവയുടെ അമിത ഉപയോഗം കുട്ടികളുടെ മാനസിക,ശാരീരിക,വൈകാരിക വിദ്യാഭ്യാസ ജീവിതത്തെ ദോഷകരമായി ബാധിച്ചിട്ടുണ്ട്. രണ്ട് വയസുവരെ കുട്ടികള്ക്ക് വീഡിയോ കോള് ഒഴികെ സ്ക്രീന് ഉപയോഗം പൂര്ണമായും ഒഴിവാക്കണം.
അഞ്ച് വയസുവരെയുള്ള കുട്ടികള്ക്ക് മാതാപിതാക്കളുടെ അറിവോടെ ഒരു മണിക്കൂറായി നിജപ്പെടുത്തണം. പന്ത്രണ്ട് വയസുവരെ സ്ക്രീന് സമയം പരമാവധി രണ്ട് മണിക്കൂറായി നിയന്ത്രിക്കണം. പതിനെട്ട് വയസുവരെ പഠനത്തിനുപുറമെ സ്ക്രീന് സമയം രണ്ട് മണിക്കൂറായി പരിമിതപ്പെടുത്തേണ്ടതാണ് എന്ന മാനസികാരോഗ്യ വിദഗ്ധരുടെയും ആരോഗ്യ പ്രവര്ത്തകരുടെയും കണ്ടെത്തലുകള് കമ്മീഷന് അംഗീകരിക്കുന്നവയാണെന്ന് ഉത്തരവില് പറയുന്നു.
നിര്ദേശങ്ങള്
- കുട്ടികള് സ്കൂളുകളില് മൊബൈല് ഫോണോ, ടാബോ കൊണ്ടുവരാനോ ഉപയോഗിക്കുവാനോ പാടില്ല. എന്നാല് ഒഴിവാക്കാനാവാത്ത സാഹചര്യത്തില് കുട്ടി മൊബൈല് ഫോണ് കൊണ്ടുവരുകയാണെങ്കില് രക്ഷിതാവിന്റെ അപേക്ഷ സഹിതം ക്ലാസ് ടീച്ചര്ക്ക് കൈമാറി നിയന്ത്രിതമായി ഉപയോഗിക്കാം. നിര്ദ്ദേശങ്ങള്ക്ക് വിരുദ്ധമായി കുട്ടികള് ഫോണോ മറ്റ് ഇലക്ട്രോണിക് ഉപകരണങ്ങളോ കൊണ്ടുവരുന്ന പക്ഷം കുട്ടിക്ക് താക്കീത് നല്കണം. കുറ്റം ആവര്ത്തിച്ചാല് ഉപകരണം പിടിച്ചെടുത്ത് ഏഴ് ദിവസത്തിനുശേഷം രക്ഷിതാവിനെ വിളിച്ചുവരുത്തി തിരികെ നല്കണം.
- മൊബൈല് ഫോണുകള് കണ്ടെത്തുന്നതിന് ബാഗ് പരിശോധനയും, ദേഹ പരിശോധനയും നടത്തുന്നത് കുട്ടികളുടെ അന്തസിനും അഭിമാനത്തിനും ഭംഗം വരുന്നതരത്തിലാവരുത്. ഇത്തരം സന്ദര്ഭങ്ങളില് അധ്യാപകര് കുട്ടികളോട് ശിശു സൗഹാര്ദമായി പെരുമാറണം.
- സ്കൂളിലെ ഫോണ് ഉപയോഗം സംബന്ധിച്ച് അധ്യയനവര്ഷാരംഭം പിടിഎ മുഖാന്തിരം അച്ചടിച്ച നിര്ദ്ദേശങ്ങള് രക്ഷിതാക്കള്ക്ക് നല്കണം.
- ഡിജിറ്റല് അവബോധം സംബന്ധിച്ച് ഒരു അധ്യയനവര്ഷം വിദഗ്ധരുടെ രണ്ട് മണിക്കൂര് ക്ലാസ് നാല് തവണ സ്കൂളിന്റെ നേതൃത്വത്തില് ലഭ്യമാക്കണം.
- കായിക വിനോദങ്ങള്, യോഗ,എയ്റോബിക്സ്, വിവിധ ഭാഷാക്ലാസുകള്, സാഹിത്യ ശാസ്ത്ര ക്ലബുകള്, വായന, ക്രാഫ്റ്റ്, കൈത്തൊഴില് എന്നിവയിലേക്ക് കുട്ടികളെ ആകര്ഷിക്കുന്ന തരത്തിലുള്ള പ്രവര്ത്തനങ്ങള് സ്കൂള്തലത്തില് നടപ്പിലാക്കണം.
കമ്മീഷന് ഉത്തരവിലെ ശിപാര്ശകള് 2026- 27 അധ്യയന വര്ഷം മുതല് പൊതുവിദ്യാഭ്യാസ വകുപ്പ് പ്രിന്സിപ്പല് സെക്രട്ടറി നടപ്പിലാക്കണമെന്നും ഉത്തരവിലുണ്ട്.
പാലക്കാട് കുമരനല്ലൂരില് മൊബൈല് ഫോണ് ഉപയോഗിച്ച വിദ്യാര്ഥി ഫോണ് തിരികെ നല്കാത്തതില് ക്ഷുഭിതനായി പ്രിന്സിപ്പലിനെ വധിക്കുമെന്ന ഭീഷണിപ്പെടുത്തിയ സംഭവത്തില് കമ്മീഷന് സ്വമേധയാ നടപടി സ്വീകരിച്ചിരുന്നു. കമ്മീഷന് ശിപാര്ശകളിന്മേല് സ്വീകരിച്ച നടപടി റിപ്പോര്ട്ട് ബന്ധപ്പെട്ട വകുപ്പ് മേധാവികള് കമ്മീഷന് ചട്ടങ്ങളിലെ ചട്ടം 45 പ്രകാരം 30 ദിവസത്തിനകം ലഭ്യമാക്കാനും ഉത്തരവില് നിര്ദ്ദേശിച്ചു.
- സ്വന്തം ലേഖിക
