ചാത്തന്നൂർ: കെഎസ്ആർടിസിയുടെ സൂപ്പർ ക്ലാസ് ബസുകളിലെ സുരക്ഷിതത്വം ഉറപ്പു വരുത്താൻ നീക്കവുമായി മാനേജ്മെന്റ്. സുപ്പർഫാസ്റ്റ് മുതൽ മുകളിലോട്ടുള്ള എല്ലാ സൂപ്പർ ക്ലാസ്, ദീർഘ ദൂര സർവീസുകളിലും ഇനി കെഎസ്ആർടിസിയുടെ സ്ഥിരം ഡ്രൈവർമാരെ മാത്രമേ നിയോഗിക്കാവൂ.
സർവീസ് ഓപ്പറേഷൻ കാര്യക്ഷമമാക്കുന്നതിനും കൂടുതൽ മെച്ചപ്പെട്ടതും സുഖകരവും സുരക്ഷിതവുമായ യാത്ര ഉറപ്പു വരുത്തുന്നതിനാണ് പുതിയ നിർദ്ദേശങ്ങൾ.
ഏറ്റവും പരിചയ സമ്പന്നരായ, മികച്ച ഡ്രൈവിംഗ് നിലവാരം പുലർത്തുന്ന സ്ഥിരം വിഭാഗം ജീവനക്കാരെ മാത്രമേ സൂപ്പർ ക്ലാസ്, ദീർഘ ദൂര ബസുകളിൽ ഡ്യൂട്ടിയ്ക്ക് അയയ്ക്കാവു എന്ന് യൂണിറ്റ് അധികൃതർക്ക് കഴിഞ്ഞ ദിവസം ഉത്തരവ്നല്കി.
നിലവിൽ പരിചയ സമ്പന്നത കുറഞ്ഞവരും ദിവസ വേതനക്കാരായ ബദലി ഡ്രൈവർമാരുമൊക്കെയാണ് സൂപ്പർ ക്ലാസ് സർവീസുകളിൽ ഡ്യൂട്ടി ചെയ്യുന്നത്. ഇത് ചെറുതും വലുതുമായ അപകടങ്ങൾക്ക് കാരണമാകുന്നുവെന്ന നിഗമനത്തിലാണ് പുതിയ ഉത്തരവ്.
അവിചാരിതമായ കാരണങ്ങളാൽ സ്ഥിരം ഡ്രൈവർമാർ ഇല്ലെങ്കിൽ താത്ക്കാലിക ഡ്രൈവർമാരിൽ നിന്നും സീനിയോറിറ്റി മാനദണ്ഡമാക്കി ഏറ്റവും സീനിയറും പരിചയ സമ്പന്നനുമായ ഡ്രൈവറെ നിയോഗിക്കാം.
ദീർഘ ദൂര സർവീസുകളോട് സ്ഥിരം ജീവനക്കാർക്ക് താത്പര്യക്കുറവുണ്ട് എന്നത് യാഥാർഥ്യമാണ്. എന്നാൽ ദിവസ വേതനക്കാരായ ബദലി ഡ്രൈവർമാർ ഏത് സർവീസ് പോകാനും സന്നദ്ധരാണ് എന്നതാണ് മറ്റൊരു പ്രത്യകത.
പ്രദീപ് ചാത്തന്നൂർ
