തിരുവനന്തപുരം: വെങ്ങാനൂരിലെ സ്വകാര്യ ധനകാര്യ സ്ഥാപനത്തിലെ സ്വര്ണാഭരണ തിരിമറിയെ തുടര്ന്ന് ആത്മഹത്യയ്ക്ക് ശ്രമിച്ച രണ്ടാമത്തെ യുവതിയും മരിച്ചു. വെങ്ങാനൂര് സ്വദേശി ഐശ്വര്യ (32) ആണ് മരിച്ചത്. സ്ഥാപനത്തിലെ മറ്റൊരു ജീവനക്കാരിയായിരുന്ന അഞ്ജു കഴിഞ്ഞ ദിവസം മരണമടഞ്ഞിരുന്നു.
ഇക്കഴിഞ്ഞ 30-ാം തീയതിയാണ് ഇരുവരും എലിവിഷം കഴിച്ച് ആത്മഹത്യയ്ക്ക് ശ്രമിച്ചത്. ഗുരുതരാവസ്ഥയിലായ ഇരുവരെയും ആശുപത്രിയില് പ്രവേശിപ്പിച്ചിരുന്നു. ഇതിനിടെയാണ് അഞ്ജുവും ഐശ്വര്യയും അടുത്തടുത്ത ദിവസങ്ങളില് മരിച്ചത്. വെങ്ങാനൂരിലെ സ്വകാര്യ ധനകാര്യസ്ഥാപനത്തിലെ ജീവനക്കാരികളായിരുന്ന ഇരുവരും തങ്ങളുടെ സുഹൃത്തായ സിന്ധുവെന്ന യുവതിക്ക് 70 പവനോളം സ്വര്ണം പണയം വയ്ക്കാന് കൊടുത്തു.
ധനകാര്യസ്ഥാപനത്തില് നിരവധി പേര് പണയം വച്ചിരുന്ന സ്വര്ണമാണ് ഇരുവരും ചേര്ന്ന് സിന്ധുവിന് മറുപണയം വയ്ക്കാന് നല്കിയത്. എന്നാല് സിന്ധു ഈ സ്വര്ണം വിറ്റു. തിരികെ സ്വര്ണാഭരണങ്ങള് എടുക്കാന് ഇടപാടുകാര് ധനകാര്യസ്ഥാപനത്തിലെത്തിയപ്പോഴാണ് സ്വര്ണതിരിമറി ശ്രദ്ധയില്പ്പെട്ടത്. ഇതേ തുടര്ന്നാണ് ഇരുവരും വിഷം കഴിച്ചത്.
സിന്ധുവിനെതിരെ നിരവധി പേര് പോലീസില് പരാതി നല്കിയിട്ടുണ്ട്.
