ഇന്ത്യയിലെ എല്ലാ സംസ്ഥാനങ്ങളും സന്ദർശിക്കുക എന്ന ലക്ഷ്യത്തോടെ യാത്ര ചെയ്യുന്ന വിദേശിയായ യാത്രാ വ്ലോഗർ ജാക്ക് ഹീറ്റൺ കേരളത്തെക്കുറിച്ച് പങ്കുവെച്ച നിരീക്ഷണങ്ങൾ സോഷ്യൽ മീഡിയയിൽ തരംഗമാകുന്നു. ഇന്ത്യയിലെ മറ്റ് പ്രദേശങ്ങളിൽ നിന്ന് കേരളത്തെ വ്യത്യസ്തമാക്കുന്നത് എന്താണെന്ന് വ്യക്തമാക്കുന്നതാണ് അദ്ദേഹത്തിന്റെ വീഡിയോ.
വീഡിയോയിൽ കേരളത്തിലെ തെരുവുകളിലൂടെ നടക്കുമ്പോൾ, ശുചിത്വമുള്ള റോഡുകളും ഹോൺ ശബ്ദങ്ങളുടെ കുറവുമാണ് ജാക്ക് എടുത്തുപറയുന്നത്. “എന്തുകൊണ്ടാണ് കേരളം ഇത്ര വ്യത്യസ്തമായിരിക്കുന്നത്?” എന്ന് ചോദിക്കുന്ന വ്ലോഗർ, ഇതിന് പ്രധാന കാരണം ഉന്നത വിദ്യാഭ്യാസവും പ്രത്യേകിച്ച് സ്ത്രീ വിദ്യാഭ്യാസത്തിന് നൽകുന്ന പ്രാധാന്യവുമാണെന്ന് വ്യക്തമാക്കുന്നു.
അമേരിക്കയേക്കാൾ ഉയർന്ന സാക്ഷരതാനിരക്ക് കേരളത്തിനുണ്ടെന്ന് ജാക്ക് ചൂണ്ടിക്കാണിക്കുന്നു. യുഎസ്എയിൽ സാക്ഷരത 79 ശതമാനമായിരിക്കുമ്പോൾ കേരളത്തിൽ അത് 96.2 ശതമാനമാണെന്നും, ഈ ഉയർന്ന വിദ്യാഭ്യാസം ജനങ്ങളിൽ മികച്ച പൗരബോധവും പരിസര ശുചിത്വവും വളർത്താൻ സഹായിച്ചതായും അദ്ദേഹം അഭിപ്രായപ്പെടുന്നു.
സംസ്ഥാനത്തെ മതസൗഹാർദ്ദ അന്തരീക്ഷവും വൈവിധ്യവുമാണ് കേരളത്തെ വേറിട്ടുനിർത്തുന്ന മറ്റൊരു ഘടകമെന്ന് അദ്ദേഹം നിരീക്ഷിക്കുന്നു. ഹൈന്ദവ, ക്രൈസ്തവ, ഇസ്ലാം മതവിഭാഗങ്ങളിൽപ്പെട്ട ജനങ്ങൾ സൗഹാർദ്ദത്തോടെ ജീവിക്കുന്ന രീതിയെക്കുറിച്ചും അദ്ദേഹം വീഡിയോയിൽ സംസാരിക്കുന്നുണ്ട്.
“ഇന്ത്യയിലെ നിരവധി പ്രദേശങ്ങൾ ഞാൻ ഇഷ്ടപ്പെടുന്നുണ്ട്, എന്നാൽ ബാക്കി ഇന്ത്യയിൽ നിന്ന് തീർത്തും വ്യത്യസ്തമായി നിൽക്കുന്ന ഒന്നാണ് കേരളം,” എന്ന വാക്കുകളോടെയാണ് അദ്ദേഹം തന്റെ വീഡിയോ അവസാനിപ്പിക്കുന്നത്. വീഡിയോ പുറത്തുവന്നതോടെ നിരവധി മലയാളികളും സഞ്ചാരികളും “കേരളം ഒരു വികാരം തന്നെയാണ്” എന്ന തരത്തിലുള്ള കമന്റുകളുമായി രംഗത്തെത്തി.
