കൊച്ചി: ഓണത്തിന്റെ വരവറിയിച്ച് കൊച്ചിയിലെ പൂവിപണി സജീവമായി. അത്തത്തിന് മുന്നോടിയായി പൂക്കളമൊരുക്കാനുള്ള പൂക്കള് തേടി ആളുകള് വിപണിയിലെത്തി തുടങ്ങിയതോടെ വില്പ്പനശാലകളില് തിരക്കേറി. ചെണ്ടുമല്ലി, ജമന്തി, അരളി, വാടാമല്ലി തുടങ്ങിയ പൂക്കള്ക്കാണ് ആവശ്യക്കാര് ഏറെയുള്ളത്.
ഓണപ്പൂക്കളുടെ വില ഇത്തവണ സാധാരണക്കാരുടെ പോക്കറ്റ് കാലിയാക്കുന്ന നിലയിലാണ്. ഓണപ്പൂക്കളത്തിലെ പ്രധാന താരമായ ചെണ്ടുമല്ലിക്ക് ഓറഞ്ച് നിറത്തിന് കിലോയ്ക്ക് 150 മുതല് 300 രൂപ വരെയും മഞ്ഞ നിറത്തിന് 150 മുതല് 250 രൂപ വരെയുമാണ് വില. വെള്ള ജമന്തിക്ക് 150 മുതല് 700 രൂപ വരെയാണ് വില. ആസ്ട്രോ ബ്ലൂ, പിങ്ക് ജമന്തികള്ക്ക് 400 മുതല് 700 രൂപ വരെയും ഈടാക്കുന്നുണ്ട്.
വയലറ്റ് വാടാമല്ലിക്ക് 250 മുതല് 350 രൂപ വരെയാണ് വില. പിങ്ക് അരളിക്ക് 450 രൂപ മുതലാണ്. ചുവപ്പ് റോസാപ്പൂവിന് 400 മുതല് 600 രൂപ വരെയും ഡച്ച് റോസിനും ഓറഞ്ച് റോസിനും 350 രൂപയുമാണ് വില.
പൂക്കളത്തിനൊപ്പം അലങ്കാരത്തിനാവശ്യമായ ഇലകള്ക്കും ആവശ്യക്കാരുണ്ട്. പനീര് ലീഫ് അഥവാ ഗ്രീന് ലീഫ് ഒരു കെട്ടിന് 100 രൂപയും കിലോയ്ക്ക് 200 രൂപയുമാണ്. ബൊക്കെ അലങ്കാരത്തിന് ഉപയോഗിക്കുന്ന കാമിനി ലീഫിന് 150 രൂപ മുതലാണ് വില. അലങ്കാരങ്ങള്ക്ക് മാത്രമല്ല, ഇവ ഇപ്പോള് പൂക്കളത്തിലും എത്താറുണ്ട്.
ബംഗളൂരു, കോയമ്പത്തൂര്, മൈസൂരു എന്നിവിടങ്ങളില് നിന്നാണ് കൊച്ചിയിലേക്ക് പ്രധാനമായും പൂക്കള് എത്തുന്നത്. ഓണാഘോഷങ്ങളുടെയും പൂക്കള മത്സരങ്ങളുടെയും ഭാഗമായി വന്തോതില് പൂക്കള് വാങ്ങാനെത്തുന്നവരുടെ എണ്ണം കൂടുന്നതിനാല് വരും ദിവസങ്ങളില് വിലയും വിപണിയിലെ തിരക്കും ഇനിയും ഉയരാനാണ് സാധ്യതയെന്ന് വ്യാപാരികള് പറയുന്നു.
ഇതിനിടെ മുല്ലപ്പൂവിനും വില കുത്തനെ ഉയര്ന്നു. കഴിഞ്ഞ ദിവസം വരെ ഒരു മുഴത്തിന് 40 രൂപയായിരുന്ന മുല്ലയ്ക്ക് ഇന്ന് 60 മുതല് 80 രൂപ വരെയാണ് വില. പൂക്കളത്തില് മുല്ലയ്ക്ക് വലിയ ഡിമാന്ഡ് ഇല്ലെങ്കിലും ചിങ്ങമാസത്തിലെ വിവാഹങ്ങള്ക്കും ഓണപ്പരിപാടികള്ക്കും മുല്ലയ്ക്ക് ആവശ്യക്കാര് ഏറെയാണ്. ഓണത്തിരക്ക് കൂടുന്നതോടെ പൂവിപണിയില് വില ഇനിയും ഉയരുമോയെന്ന ആശങ്കയിലാണ് ഉപഭോക്താക്കള്.
