കുഞ്ഞിന് ജന്മം നൽകുന്ന രംഗങ്ങൾ പുനഃസൃഷ്ടിക്കാൻ സഹായിക്കുന്ന വ്യത്യസ്തമായ ഒരു പാവയെച്ചൊല്ലി സോഷ്യൽ മീഡിയയിൽ വൻ തർക്കവും ചർച്ചകളും. ഗർഭിണിയുടെ രൂപത്തിലുള്ള പാവയുടെ വയർ ഊരിമാറ്റി ഉള്ളിലെ കുഞ്ഞിനെ പുറത്തെടുക്കാനും, പിന്നീട് കുഞ്ഞിനെ പാവയുടെ കയ്യിൽ വെച്ചു കൊടുക്കാനും സാധിക്കുന്ന രീതിയിലാണ് ഇത് രൂപകൽപ്പന ചെയ്തിരിക്കുന്നത്.
യുഎസ് ആസ്ഥാനമായി പ്രവർത്തിക്കുന്ന ‘സുരു’ എന്ന കളിപ്പാട്ട കമ്പനിയാണ് ‘മൈ മിനി ബേബി മോം ആൻഡ് ബേബി സർപ്രൈസ്’ (My Mini Baby Mom and Baby Surprise) എന്ന പേരിലുള്ള ഈ സെറ്റ് നിർമിച്ചിരിക്കുന്നത്. ഇൻസ്റ്റാഗ്രാമിൽ ഇതിന്റെ അൺബോക്സിംഗ് വീഡിയോ പ്രത്യക്ഷപ്പെട്ടതോടെയാണ് പാവ ശ്രദ്ധനേടിയത്.
‘എക്സ് ഒ എക്സ് ഒ ടോയ്സ്’ (Xoxo Toyz) എന്ന ഇൻസ്റ്റാഗ്രാം പേജാണ് വീഡിയോ പങ്കുവെച്ചത്. വട്ടത്തിലുള്ള വലിയ വയറുള്ള പാവയുടെ ഉള്ളിൽ നിന്ന് കുഞ്ഞിനെ പുറത്തെടുക്കുന്നതും, വസ്ത്രം ധരിപ്പിച്ച് അമ്മപ്പാവയുടെ കയ്യിൽ നൽകുന്നതും വീഡിയോയിൽ കാണാം. കുഞ്ഞിനെ പുറത്തെടുത്ത ശേഷം പാവയുടെ വയർ വീണ്ടും അടയ്ക്കാനും സാധിക്കും.
എന്നാൽ ഈ കളിപ്പാട്ടത്തിന്റെ ആശയം കുട്ടികൾക്ക് അനുയോജ്യമാണോ എന്ന ചോദ്യവുമായി നിരവധി പേർ രംഗത്തെത്തിയിട്ടുണ്ട്. കുട്ടികൾക്ക് കളിക്കാൻ ഇത്തരമൊരു പാവ ആവശ്യമില്ലെന്നും, ഇത് അവരുടെ ചിന്താഗതിയെ പ്രതികൂലമായി ബാധിച്ചേക്കാമെന്നും ചിലർ അഭിപ്രായപ്പെട്ടു. “ഞാൻ കണ്ടിട്ടുള്ളതിൽ വച്ച് ഏറ്റവും വിചിത്രവും അനാവശ്യവുമായ കളിപ്പാട്ടം,” എന്നാണ് ഒരാൾ കുറിച്ചത്.
അതേസമയം, തമാശരൂപേണയുള്ള കമന്റുകളും വീഡിയോയ്ക്ക് താഴെ എത്തുന്നുണ്ട്. “അച്ഛനെ വേറെ വാങ്ങേണ്ടി വരുമോ?” എന്നും “പ്രസവം ഇത്രയും എളുപ്പമായിരുന്നെങ്കിൽ എത്ര നന്നായിരുന്നു” എന്നുമൊക്കെയാണ് ചിലരുടെ കമന്റുകൾ. നിലവിൽ വൻ തോതിലുള്ള പ്രതികരണങ്ങളാണ് ഈ പോസ്റ്റിന് ലഭിച്ചുകൊണ്ടിരിക്കുന്നത്.
