മഹാരാഷ്ട്രയിലെ മുംബൈ-അഹമ്മദാബാദ് ദേശീയ പാതയിൽ മിൽക്ക് ടാങ്കർ മറിഞ്ഞ് വൻ അപകടം. അപകടത്തിൽ ടാങ്കറിലുണ്ടായിരുന്ന പാൽ റോഡിലേക്ക് ഒഴുകിപ്പരന്നതോടെ, പാൽ ശേഖരിക്കാനായി കുപ്പികളും പാത്രങ്ങളുമായി നാട്ടുകാർ ഓടിയെത്തിയത് മേഖലയിൽ വലിയ തിക്കും തെരക്കും സൃഷ്ടിച്ചു.
തിങ്കളാഴ്ച പാൽഘറിലായിരുന്നു സംഭവം. നിയന്ത്രണം വിട്ട ടാങ്കർ ദേശീയപാതയിൽ മറിയുകയായിരുന്നു. റോഡിലേക്ക് ഒഴുകിയ പാൽ പ്രദേശവാസികളും വാഹന ഡ്രൈവറും ചേർന്ന് പാത്രങ്ങളിലും കുപ്പികളിലും ശേഖരിക്കുന്നതിന്റെ ദൃശ്യങ്ങൾ സോഷ്യൽ മീഡിയയിൽ പ്രചരിക്കുന്നുണ്ട്.
അപകടത്തെ തുടർന്ന് മുംബൈ-അഹമ്മദാബാദ് ദേശീയ പാതയിൽ കുറച്ചുസമയം ഗതാഗതം തടസപ്പെട്ടു. വിവരമറിഞ്ഞ് സ്ഥലത്തെത്തിയ അധികൃതരും പോലീസും ചേർന്ന് വാഹനം മാറ്റുകയും ഗതാഗതം പുനഃസ്ഥാപിക്കുകയും ചെയ്തു. അപകടത്തിൽ ആളപായമൊന്നും റിപ്പോർട്ട് ചെയ്തിട്ടില്ല. അപകടത്തിന്റെ കൃത്യമായ കാരണം വ്യക്തമായിട്ടില്ലെന്നും അന്വേഷണം നടക്കുകയാണെന്നും അധികൃതർ അറിയിച്ചു.
