ആർട്ടിഫിഷ്യൽ ഇന്റലിജൻസിന്റെയും സാങ്കേതികവിദ്യകളുടെയും അപകടങ്ങളെക്കുറിച്ച് ജനങ്ങൾക്ക് മുന്നിൽ മുന്നറിയിപ്പ് നൽകുന്നതിനിടെ പ്രിൻസ് ഹാരിക്ക് നേരിടേണ്ടി വന്നത് അപ്രതീക്ഷിത തിരിച്ചടി. സാങ്കേതികവിദ്യയുടെ കടന്നുകയറ്റത്തെക്കുറിച്ച് സംസാരിച്ചുകൊണ്ടിരുന്ന അദ്ദേഹത്തിന്റെ ടെലിപ്രോംപ്റ്റർ പ്രസംഗത്തിനിടയിൽ പെട്ടെന്ന് പ്രവർത്തനരഹിതമായി.
ന്യൂയോർക്കിൽ നടന്ന ക്ലിന്റൺ ഗ്ലോബൽ ഇനിഷ്യേറ്റീവ് വാർഷിക സമ്മേളനത്തിലായിരുന്നു സംഭവം. കുട്ടികളിൽ എഐയും സോഷ്യൽ മീഡിയയും ഉണ്ടാക്കുന്ന ആഘാതങ്ങളെക്കുറിച്ച് പ്രസംഗിക്കുകയായിരുന്നു ഹാരി. “വരാനിരിക്കുന്ന കാര്യങ്ങൾ നേരിടാൻ നമുക്ക് വർഷങ്ങളുടെ സമയമില്ല…” എന്ന് പറഞ്ഞ് നിമിഷങ്ങൾക്കകം ടെലിപ്രോംപ്റ്ററിലെ എഴുത്തുകൾ അപ്രത്യക്ഷമായി.
തുടർന്ന് അൽപ്പം ആശയക്കുഴപ്പത്തിലായ ഹാരി, “ഇത്രയേ ഉള്ളൂ?” (And that’s it?) എന്ന് ചോദിച്ച് മൈക്ക് താഴെവെച്ച് വേദിയിൽ നിന്ന് മടങ്ങി.
ഏകദേശം 40 മിനിറ്റുകൾക്ക് ശേഷം സാങ്കേതിക തകരാറുകൾ പരിഹരിച്ചതിനെ തുടർന്ന് അദ്ദേഹം വേദിയിലേക്ക് തിരിച്ചെത്തി പ്രസംഗം പൂർത്തിയാക്കി. എന്നാൽ സംഭവിച്ച അബദ്ധം മറച്ചുവെക്കാൻ ശ്രമിക്കാതെ തമാശരൂപേണയാണ് അദ്ദേഹം അതിനോട് പ്രതികരിച്ചത്. “എഐ എന്റെ പ്രസംഗത്തിൽ ഇടപെട്ടു, അതുകൊണ്ടാണ് ഇത് പൂർത്തിയാക്കാൻ എന്നെ വീണ്ടും ഇങ്ങോട്ട് അയച്ചത്” എന്ന അദ്ദേഹത്തിന്റെ ട്രോൾ മറുപടി സദസിൽ ചിരിപടർത്തി.
ഹാരി വേദി വിടുന്നതിന്റെ പിന്നീട് തിരിച്ചെത്തുന്നതിന്റെയും ദൃശ്യങ്ങൾ ഇപ്പോൾ സോഷ്യൽ മീഡിയയിൽ വൈറലാണ്. എഐയെ വിമർശിച്ച പ്രസംഗത്തിനിടെ തന്നെ സാങ്കേതികവിദ്യ വില്ലനായതിന്റെ വൈരുദ്ധ്യമാണ് നെറ്റിസൺസ് ചൂണ്ടിക്കാണിക്കുന്നത്.
മേഗൻ മാർക്കിളിനും മക്കളായ ആർച്ചിക്കും ലിലിബെറ്റിനുമൊപ്പം ബ്രിട്ടനിലേക്ക് താമസം മാറിയ ശേഷം ഹാരി പങ്കെടുത്ത പ്രധാന പൊതുപരിപാടികളിലൊന്നായിരുന്നു ഇത്.
